Maður sem býr við slíkan andbyr finnur það alla daga.
Kristján Þór Júlíusson er ágætt dæmi um hvernig Samherji fer með fólk. Þau sem ganga erinda fyrirtækisins tapa ærunni og líða þjáningar af þeirri ástæðu. Aðeins 11% fólks er ánægt með störf Kristjáns sem ráðherra en 61% óánægð. Maður sem býr við slíkan andbyr finnur það alla daga, hverja stund dagsins. Hvar sem Kristján kemur sem ráðherra skynjar hann að hann er þar í óþökk fólks. Nema kannski á fundum með kvótagreifunum.
Þótt Kristján geti sjálfum sér um kennt, er ekki annað en hægt að finna til með honum. Það fylgir því nánast líkamleg kvöl að búa við þessar aðstæður, að ekki sé talað um andlegt álag. Hann er eins og persóna í miðaldaskáldskap sem selt hefur djöflinum sál sína og engist um í mannheimum. Og skiljanlega hefur Kristján ákveðið að sækjast ekki eftir endurkjöri, veit að líklega myndu sauðirnir í Sjálfstæðisflokknum verja hann í prófkjöri en kosningabaráttan hans, sem sjávarútvegsráðherra Samherja, yrði óbærileg raun, ómennskt álag.
Hvað haldið þið að fangarnir í Namibíu hugsi í dag, sem freistuðust til að starfa með Samherja? Sáuð þið framkvæmdastjóra, og meintan aðaleiganda Framherja í Færeyjum, í sjónvarpinu í vikunni? Örvinglaður maður frammi fyrir spurningum fréttamanns þegar undið var ofan af vefnum. Aumingjans fólkið sem þiggur fé frá Samherja til að framleiða lygaáróður um fyrirtækið og óhróður um þau sem hafa bent á hvurslags glæpafyrirtæki þetta er, fólkið sem tekið hefur að sér að ofsækja saklaust fólk fyrir það eitt að falla ekki fram og tilbiðja Þorstein Má Baldvinsson.
Auðvitað er skaðinn sem Samherji veldur samfélaginu hér og víða um heim umfangsmeiri en sá sálarskaði, sem ég bendi á hér. Fyrirtækið stelur launum af sjómönnum, hafnargjöldum af sveitarfélögum, sköttum frá ríkissjóðum, felur fé í aflöndum, mútar og spillir; virkar eins og illkynja mein í samfélaginu. En skaðinn er ágengastur innra með þeim sem freistast til að ganga í lið Samherja, það er engu líkara en að þeir fyrirgeri sál sinni með því að taka sér stöðu með Samherja. Samherji arðrænir samfélagið, en það liggur við að það sé betra að verða fyrir því en að vera í liði með Samherja.
