Þetta eru margar hafragrauts-skálar.
„Einstætt foreldri sagði við mig nýlega: Hafragrautur á morgnana og hafragrautur seinni partinn eftir 15. hvers mánaðar. Þá er peningurinn búinn og þá hefur viðkomandi, eftir leigugreiðslur og önnur útgjöld, ekki efni á öðru fæði,“ sagði Guðmundur Ingi Kristinsson á Alþingi.
„Viðkomandi sagði að um helgar væri líka hafragrautur en þá væru hafðir með þurrkaðir ávextir, rúsínur og annað, og kanill til að fá tilbreytingu og lúxus. Getum við ekki boðið þessum einstaklingi og fleirum fimm daga dvöl á hóteli og fæði? Við gerum það með ferðamenn og erum ekki að bjarga verðmætum þar. Ég get ekki séð að ferðamenn sem koma til að skoða gosið á Reykjanesi séu að bjarga verðmætum, það er kostnaður. Þar af leiðandi hlýtur að vera hægt að bjóða þessum einstaklingum að fá a.m.k. fimm daga á hótelherbergi og fæði en best væri að gera það líkt og með störfin 7.000, fram yfir kosningar.“
Bjarna Benediktssyni var ekki skemmt. Hann setti sig í kunnuglegar stellingar:
„Það er alltaf dálítið snúið að taka einstök dæmi eins og hv. þingmaður nefnir. Maður vill skilja hvað er á bak við. Maður vill skilja hverjar tekjurnar eru, hverjir tekjustraumarnir eru, hvort viðkomandi sé virkur á atvinnumarkaði eða ekki. En ég get nefnt eitt dæmi hér; að fyrir einstætt foreldri með tvö börn þá hafa breytingar á barnabótum í tíð þessarar ríkisstjórnar styrkt stöðu einstæðs foreldris með 300.000 kr. í tekjur á mánuði um meira en 100.000 kr. á ári. Það eru 100.000 kr. viðbótarbarnabætur á ári bara vegna breytinganna sem við í þessari ríkisstjórn höfum verið að gera. Þetta skiptir máli. Ef háttvirtur þingmaður vill mæla það í hafragrautsskálum eru þetta margar hafragrautsskálar.“
