Gunnar Smári skrifar:
Hvað merkir þetta? Auðveldasti samanburðurinn á ánægju og óánægju fólks með ráðherranna er sambærilegar mælingar á ánægju fólks með störf forseta Bandaríkjanna, sem ná langt aftur.
Ánægja fólks með Katrínu Jakobsdóttur er sambærileg og ánægja Bandaríkjamanna með Joe Biden, þessa fyrstu vikur hans í Hvíta húsinu. Það eru hins vegar tvisvar sinnum fleiri sem eru óánægð með Biden en Katrínu. Ánægjan með Katrínu er nálægt meðaltalinu hjá Bill Clinton og Lyndon B. Johnson, aðeins undir meðaltali George Bush eldri.
Ánægja með Ásmund Einar Daðason og Svandísi Svavarsdóttur eru nálægt meðaltalinu hjá Barrack Obama. Það voru hins vegar fleiri óánægð með Obama. Ásmundur og Svandís eru á svipuðum slóðum og Dwight D. Eisenhower var á hans versta degi.
Það er því undur og stórmerki að Kristján skuli vera í opinberu starfi.
Lilja Alfreðsdóttir er aðeins yfir meðaltali Donald J. Trump og Sigurður Ingi Jóhannsson á versta degi Gerald Ford. Áslaug Arna Sigurbjörnsdóttir og Guðlaugur Þór Þórðarson er á svæðinu sem nær frá versta degi Trump að versta degi Ford.
Þórdís Kolbrún Reykfjörð Gylfadóttir er aðeins yfir versta degi Jimmy Carter varðandi ánægju og við versta dag John F. Kennedy varðandi óánægju. Guðmundur Ingi Guðbransson er á svipuðum slóðum, aðeins verri þó.
Það eru álíka margir ánægðir með Bjarna Benediktsson og voru ánægðir með Trump á hans versta degi, daginn þegar hann yfirgaf Hvíta húsið. Það er því ekki rétt, það sem haldið hefur verið fram að Bjarni sé teflon-maður, að ekkert festist á mannorði hans. Bjarni er með allra óvinsælustu stjórnmálamönnum Íslandssögunnar, einn fárra sem náð hefur því að mun fleiri eru óánægðir með hann en ánægðir. Hann er með meiri andbyr en Biden en aðeins rúmlega helminginn af stuðningnum. Undir venjulegum kringumstæðum eru slíkir stjórnmálamenn dead man walking, en af einhverjum undarlegum ástæðum hefur forysta annarra flokka keppst við að bera Bjarna til valda.
En staða Bjarna er ekki eins slæm og Kristjáns Þórs Júlíussonar, sem kallaður hefur verið sjávarútvegsráðherra Samherja. Okkar maður í ríkisstjórninni, eins og Samherjamenn segja. Það hefur enginn forseti Bandaríkjanna mælst með aðeins 9% ánægju og óánægjan með Kristján er viðlíka og var með Richard M. Nixon þegar hann sagði af sér og flaug úr Hvíta húsinu á þyrlu. Þá voru álíka margir óánægðir með Nixon og Kristján Þór í dag en þá voru 2,5 sinnum fleiri ánægðir með Nixon en Kristján Þór í dag. Það er því undur og stórmerki að Kristján skuli vera í opinberu starfi, eitthvað sem aldrei gæti gerst í öðru landi.
