Besta leiðin til að fella ríkisstjórnina og koma Sjálfstæðisflokknum frá völdum er að kjósa Sósíalistaflokkinn.
Gunnar Smári skrifar:
Ný könnun MMR sýnir uppsveiflu ríkisstjórnarflokkana, svo mikla að í fyrsta sinn í háa herrans tíð myndi fylgi þeirra duga til að halda meirihluta á þingi, 34 þingmenn á móti 29 hjá stjórnarandstöðunni. Mögulega má rekja þetta til feginleika yfir að síðasta bylgja cóvid er að ganga niður. Uppsveiflan kemur einkum til VG og Framsóknar, Sjálfstæðisflokkurinn tapar rúmlega 2 prósentustiga fylgi frá í janúar og hinir flokkarnir bæta viðlíka við sig. Eftir sem áður hafa flokkarnir tapað fylgi frá kosningum, samanlagt um 5 prósentustigum.
Athygli á Samfylkinguna að undanförnu hefur ekki hjálpað flokknum, hann fellur úr 15,6% í 13,1%. Eins og ætíð þegar Samfylkingin fer niður hækkar Viðreisn, fer úr 8,8% í 10,6%.
Annars er varasamt að draga of miklar ályktanir af þessum fylgissveiflum því aðeins hækkun VG og Framsóknar er utan skekkjumarka, lækkun Samfylkingar og Flokks fólksins á mörkunum.
Sósíalistaflokkurinn er með 4,1% í þessari könnun (skekkjumörk 2,7-5,5%). Ef flokkurinn myndi rífa 5% múrinn í þessari könnun myndi ríkisstjórnin falla; flokkurinn fengi þrjá þingmenn sem kæmu frá VG, Sjálfstæðisflokki og Framsókn. Ef þið viljið draga ályktun af þessu þá er í boði að segja: Besta leiðin til að fella ríkisstjórnina og koma Sjálfstæðisflokknum frá völdum er að kjósa Sósíalistaflokkinn.
