„Það er mælt með því af hálfu Bankasýslunnar að við látum reyna á skráningu á bankanum núna,“ sagði fjármálaráðherrann í fréttum Ríkisútvarpsins.
Hann lætur sem honum hafi, án eigin afskipta, borist óvænt tíðindi frá Bankasýslunni. Bjarni, og hans hjörð, eru sér á báti. Eina fólkið sem vill selja Íslandsbanka. Kannski langar fólkið frekar að kaupa bankann. Um það kann þetta að snúast. Allt er þetta asnalegur og augljós leikþáttur.
Skýringar ráðherrans eru þessar:
„Og við erum þá að horfa til þess að skrá hluta bankans og losa síðan í gegnum markaðinn frekara eignarhald ríkisins á komandi misserum og árum. Þannig ættum við að fá meðalverð markaðarins yfir tímabilið sem selt er og ef við horfum til þess sem hefur verið að gerast á hlutabréfamörkuðum undanfarið ár, þá er það bæði svo að hlutabréf hafa verið að hækka umtalsvert í verði, bæði bankar og önnur fyrirtæki.“
Þetta er allavega broslegt. Ótrúleg samsuða.
Næst var spurt: Þannig að þú tekur ekki undir að vextir séu lágir og betra að bíða núna og selja bankann síðar þó að ríkissjóður sé skuldugur?
„Það er gott fyrir hlutabréfaverð ef vextir eru lágir þannig að það ætti að hjálpa til við söluna.“
Þannig að þú ert fylgjandi þessu?
„Já já,“ segir Bjarni Benediktsson fjármálaráðherra.
Þess er að vænta stuðningsflokkar Sjálfstæðisflokksins í ríkisstjórninni leyfa Bjarna að selja, eða kaupa, ráðandi hlut í Íslandsbanka. Bjarni og hans fólk hafa gert það fyrr. Áttu þá sinn eigin bankastjóra sé rétt munað.
-sme
