Stjórnmál Bjarni Benediktsson og Sigmundur Davíð Gunnlaugsson hafa ekki rætt hvort stokkað verði upp í ríkisstjórninni um áramótin. „Við höfum lítið rætt það undanfarið. Ég er spurður hvort það komi til greina, ég játa að það kæmi til greina.“
Þetta kom fram í viðtali við Bjarna í Sprengisandi í gær.
Finnst þér þörf á að gera breytingar?
„Ekki þörf, nei. Mæti ég það svo að það væri þörf á breytingum þá væri ég búinn að afgreiða það mál.“
Ertu sáttur við þína ráðherra, ráðherra Sjálfstæðisflokksins?
„Mér finnst að þegar störf ríkisstjórnarinnar eru skoðuð finnst mér við á skömmum tíma komið ótrúlega miklu í verk. Mörgum stórum málum. Skuldaleiðréttingin, það sem er verið að gera í haftamálunum, lokun fjárlagagatsins, lækkun skatta á almenning, afnám tolla og vörugjalda. Mér finnst við hafa náð mörgum mikilvægum áföngum.“
Bjarni benti á að enginn ráðherranna hafði reynslu af því að vera í ráðherrastól þegar ríkisstjórnin var mynduð; „…og þegar til þessa er horft finnst mér allir hafa staðið sig alveg prýðilega.“
Starf ráðherra á ekki að vera auðvelt
Það blæs um suma ráðherrana?
Þannig á það að vera. Það á ekki að biðja um að þetta sé auðvelt. Ef ráðherrar halda að þetta sé auðvelt eiga þeir að finna sér annað að gera. Þeir sem setja sig í þessa stöðu verða að vera tilbúnir að taka gagnrýni.“
„Ég hef fundið fyrir þessu sjálfur, bæði áður en ég varð ráðherra og eftir. Oft er vegið harkalega að mönnum og sótt að. Ég hef lært með tímanum að þetta er hluti þess að gefa kost á sér til forystustarfa að þurfa að svara fyrir ýmis mál, bæði þau sem manni kann að þykja ósanngjörn og önnur. Það slípar mann til og gerir mann auðmjúkari fyrir viðfangsefninu.“
Gera sér erfitt fyrir
Hvað viltu segja um stöðu Illuga Gunnarssonar?
„Illugi hefur svarað ágætlega fyrir þetta. Menn geta gert sjálfum sér erfitt fyrir. Til dæmis með því að sækjast eftir forystu í stjórnmálum og vera á sama tíma í viðskiptum. Ég gerði þetta þegar ég var þingmaður, þá gaf ég kost á mér til stjórnarsetu og slíkra hluta. Ég tók þá ákvörðun árið 2008 að ég ætlaði ekki að eiga nein verðbréf af nokkru tagi, engin hlutabréf, ekki að sinna neinu öðru en þessu. Ég hef staðið við það.“
Áttu ekki hlut í neinu fyrirtæki?
„Nei. Ekki eitt hlutabréf í einu einasta fyrirtæki. Ég hef ekki haft neinar tekjur annarsstaðar frá.“
Ertu ekki með verðbréfareikning í heimabankanum?
„Nei, það er ég ekki. En ég á krónur. Ég er ekki í neinum hlutabréfaviðskiptum. Ég geri þetta til að gera mér auðveldara að sinna þeim störfum sem ég hef tekið að mér.“
