Samfélag Alþingismaðurinn Jón Gunnarsson er ekki sáttur með Björk Guðmundsdóttur og spyr hvort hún borgi skatta á Íslandi. „Spyr sá sem ekki veit,“ skrifar Jón á Facebook.
Sky birti viðtal við tónlistarkonuna þar sem hún sagði meðal annars: „Það er aðeins minnihluti Íslendinga, sveitalubbar á borð við forsætisráðherra Íslands og fjármálaráðherra, sem vilja útmá hálendið. Ég er aðeins talsmaður hins almenna Íslendings sem vill halda Íslandi eins og það er.“
Jóni misbauð og skrifaði: „Ég skal fúslega viðurkenna að ég botna ekkert í þessari konu. Þingið væri örugglega ekki verra ef þar væru fleiri með hugsunarhátt sveitamannsins. Niðurstaða loftlagsráðstefnunnar hvetur okkur til að nýta með skynsömum hætti endurnýjanlegar orkuauðlindir landsins til aukinnar verðmætasköpunar. Nýting þeirra mun skapa traustan grunn að Íslensku samfélagi, tækifæri til að gera svo mikið betur á mörgum sviðum. Ég reikna ekki með að Björk leggi sín lóð á þær vogarskálar, eða borgar hún skatta og gjöld á Íslandi. Spyr sá sem ekki veit. Hún er frekar dauf til augnanna á bakvið grímuna.“
Með frétt Vísis af málinu var mynd af Björk með höfuðgrímu.
„Við höfum þekkinguna til þess að gera heiminn að stað þar sem náttúra, tæknin og mannkynið getur búið saman í sátt og samlyndi. En það að komast á þann stað er svo erfitt og allar breytingar í þá átt virðast stoppa vegna skrifræðis og stjórnmála. Já, og grægði,“ sagði hún einnig í viðtalinu.
