„Ríkisstjórnin á ekki að loka augunum fyrir nauðsyn þess að hækka atvinnuleysisbætur – eins og hún virðist ætla að gera. Við erum að fara inn í erfiðan vetur. Atvinnuleysi verður meira á næstu mánuðum en það hefur nokkru sinni verið á Íslandi,“ skrifar Styrmir Gunnarsson á styrmir.is.
„Það eitt út af fyrir sig mun skapa meiri þjóðfélagslegan óróa, en við höfum áður kynnzt. Ef til viðbótar kemur að fólk eigi ekki fyrir mat og fatnaði fyrir börnin sín skapast óþolandi ástand. Aðalhagfræðingur Kvikubanka hefur bent á augljósa og sjálfsagða millileið, þ.e. að hækka atvinnuleysisbætur tímabundið. Þeirri ráðgjöf á ríkisstjórnin að fylgja.“