Það er beinlínis klikkað að Svanur Guðmundsson skuli nú vera bálreiður út í RÚV, fyrir að hafa sagt frá málinu á sínum tíma.
Sigurjón Þórðarson skrifar:
Í sjálfu sér er furðulegt að Svanur, framkvæmdastjóri „Bláa hagkerfisins“ skuli nú, sjá sig knúinn til að gera athugasemdir við 8 ára gamla skýrslu Verðlagsstofu skiptaverðs, sem gaf skýrt til kynna að Samherji hefði snuðað sjómenn. Skýrslan varð til þess að úrskurðarnefndin í málinu, lá á Samherja í nokkur ár og óskað var eftir skýringum og leiðréttingu. Það er beinlínis klikkað að Svanur Guðmundsson skuli nú vera bálreiður út í RÚV, fyrir að hafa sagt frá málinu á sínum tíma.
Það gefur auga leið að það er eitthvað verulega mikið að málstað manna sem heimta ritskoðun og aðeins séu fluttar sérvaldar fréttir, eins og Svanur gerir kröfu um í grein sinni. Það kemur verulega á óvart að menn sem vilji láta taka sig alvarlega setji fram þessa afstöðu á Íslandi árið 2020, sem frekar hefði mátt búast við að yrði sett á prent í Alþýðulýðveldinu Kína.