Gunnar Smári skrifar: Það hefur ætíð verið ljóst að Guðni Th. er fremur forseti elítunnar, sem telur sig réttborna til valda, fremur en forseti almennings. Sem er alveg glatað, því þetta embætti er til einskis og í raun bara hlægilegt ef þar situr maður sem myndar ekkert mótvægi við þann hluta elítunnar sem náð hefur völdum hverju sinni. Guðni Th. hefur aldrei í forsetatíð sinni stigið fram og lýst því yfir að almenningur hafi valið sér stjórnarskrá og elítunni beri að hlýða. Það er til ein setning eftir hann sem fylgjendur stjórnarskrárfélagsins vitna stundum til, þegar þeir vilja sanna að Guðni Th. sé þeirra maður, en hún var sögð þegar Guðni Th. var að sækja um starfið, var í framboði. Í embætti hefur hann aldrei lagt neina sérstaka áherslu á þjóðaratkvæðagreiðsluna 2012 og ekki gert neinar athugasemdir við að elítan hefur hunsað hana. Nú stekkur Guðni Th. hins vegar fram og flýtir sér að lýsa yfir stuðningi við ákvæði stjórnarskrárinnar sem Skúli Magnússon héraðsdómari samdi fyrir Katrínu Jakobsdóttur og elítan vill að gildi fremur en sú stjórnarskrá sem þjóðin valdi. Hvað er það?
Erum við með forseta sem er að segja okkur að elítan eigi ekki að fara eftir vilja þjóðarinnar, heldur eigi þjóðin að fara eftir vilja elítunnar?
Í þessu viðtali ræðir Guðni Th. að forseti eigi að láta í sér heyra þegar hugnast ekki aðgerðir stjórnvalda. Honum tekst svo að ræða stjórnarskrá í nokkrum smáatriðum án þess að geta þjóðaratkvæðagreiðslunnar frá 2012. Það segir allt um hug hans til þess máls.
Illugi Jökulsson skrifaði: Fyrst Guðni Th. Jóhannesson er farinn að lýsa skoðunum sínum á stjórnarskráráformum núverandi ríkisstjórnar, þá væri aldeilis kjörið að hann lýsti skoðunum sínum á þeirri ákvörðun ríkisstjórna að taka ekki mark á þjóðaratkvæðagreiðslu um stjórnarskrána 2012. Guðni er og vill vera maður fólksins; því ætti hann hiklaust að taka sér stöðu með hugmyndum um þjóðina sem stjórnarskrárgjafa, en ekki taka þátt í makki ríkisstjórna sem gefa ekkert fyrir vilja fólksins í fyrrnefndri atkvæðagreiðslu.