Vissulega er alrangt að kalla fimm þúsund krónurnar „ferðagjöf“. Fólkið í landinu á ríkissjóð svo það er varla að gefa sjálfu sér það sem það á. Þaðan af síður er ríkisstjórn Íslands að gefa þjóðinni það sem hún á sjálf.
Hvað um það. Þorgerður Katrín Gunnarsdóttir spurði ferðamálaráðherrann, Þórdísi Kolbrúnu R. Gylfadóttur um „ferðagjöfina“.
„Við þurfum að gera allt núna til að halda fyrirtækjunum gangandi og halda þannig á málum að við getum ýtt fyrirtækjunum áfram þannig að þau haldist vonandi sem flest á lífi,“ sagði Þorgerður Katrín Gunnarsdóttir, formaður Viðreisnar.
Þórdís Kolbrún svaraði: „Auðvitað eru fyrirtækin í landinu með mjög mismikla afkastagetu og það er kannski þannig að ef fyrirtæki tekst vel að skrá sig til leiks og auglýsa einhvers konar tilboð þá geta áhrifin á fyrirtæki með litla afkastagetu orðið miklu meiri en á stór fyrirtæki á höfuðborgarsvæðinu með mjög mikla afkastagetu. Þessi aðgerð gæti haft meiri áhrif á slík fyrirtæki.“
