Leiðari / Þríeykið ágæta vann sér traust og trúnað þjóðarinnar. Með látlausri, fumlausri og skýrri framgöngu. Ekkert orðagjálfur. Málin voru skýrð á besta máta. Áhorf á daglega fundi þeirra var hreint ævintýri. Annað eins hefur varla sést.
Ráðafólkinu þótti greinilega nóg um. Vinsældir þríeykisins sló stórum skugga á stjórnmálafólkið. Svo kalt varð þeim í skugganum að í þessari viku reyna þrír ráðherrar að baða sig í birtunni sem stafar frá þríeykinu.
Þetta úldna bragð stjórnmálanna er fætt til að mistakast. Ráðherrarnir Katrín Jakobsdóttir, Svandís Svavarsdóttir og Áslaug Arna Sigurbjörnsdóttir eiga enga möguleika í þessum leik. Það fólk sem horfir á þætti með þeim í forgrunni bíður þar til ráðherrarnir hafa lokið sér af.
Fólk vill ekki pólitískar ræður. Það vill fá þríeykið. Það vill einfaldar skýringar á stöðu mála. Engar framboðsræður. Síst frá fólkinu sem ber ábyrgð á að hjúkrunarfræðingar stefna í verkfall vegna vanmáttar ríkisstjórnarinnar.
Ráðafólkið verður að skilja að það á ekkert erindi í þessa umræðu. Fólk hlustar ekki. Ráðafólki er nær að halda sig í vinnunni. Þar er margt óleyst. Nóg að gera. Þó þeim þyki kalt í skugganum er víst að birtan sem stafar frá þríeykinu dugar stjórnmálafólkinu hvergi.
-sme
