Alþingi Þingmenn stjórnarandstöðunnar voru afar ósáttir þegar tillaga um fleiri virkjunarkosti var sett á dagskrá þingsins í gær. Orðaskak varð talsvert. Einar k. Guðfinnsson, forseti þingsins, sagði meðal annnars að sér þætti leitt ef þingmenn væru ósáttir.
Skoðum hluta umræðunnar.
Ófaglegt, óskynsamlegt
Jón Þór Ólafsson: „En það er mjög sniðugt framlag hjá háttvirtum þingmanni Jóni Gunnarssyni að leggja fram fullt af breytingartillögum um fleiri virkjunarkosti, fimm til viðbótar, sem hafa ekki farið í þetta faglega ferli. Ófaglegt, óskynsamlegt.“
Virkja Gullfoss?
Árni Páll Árnason: „Þetta er jafn klikkað og þetta er jafn fráleitt og ef við stæðum frammi fyrir því að ríkisstjórnin legði til að virkja Gullfoss.“
Í guðanna bænum
Guðmundur Steingrímsson: „ Þeir sem vilja virkja meira geta komið með sérstaka tillögu hingað inn í samræmi við lög. Þeir leggja það ekki fram sem breytingartillögu á milli umræðna um þingsályktunartillögu. Í guðanna bænum, ekki setja málið á dagskrá.“
Viðhalda vantrausti
Svandís Svavarsdóttir: „…og ríkisstjórnin er að sýna það, og því miður er forusta þingsins að hjálpa til við það, að viðhalda vantrausti og ófriði í þessu samfélagi.“
Tuddaskapur
Katrín Júliusdóttir: „Það skiptir máli hvernig við komum fram á hinu háa Alþingi. Það er ekki svona, með svona tuddaskap eins og þessi ríkisstjórn er orðin heimsfræg fyrir.“
Sandkassaleikur
Helgi Hjörvar: „Tugþúsundir Íslendinga kalla eftir því að stjórnmálaforustan bæti kjör fólksins í landinu, en stjórnarmeirihlutinn vill bara vera í sandkassaleik um algerlega ótímabærar virkjunartillögur.“
Kallaður Friðjón
Róbert Marshall: Ég bið háttvirtan þingmann Jón Gunnarsson, sem af flestum er kallaður Friðjón Gunnarsson þessa dagana, að koma í ræðustól og gera grein fyrir því hvaða rökstuðningur er fyrir því að … Það er bara grafarþögn í salnum.“
