Það er blekkingarleikur og jafnvel ólöglegt að breyta heimasíðu opinbers félags.
Vigdís Hauksdóttir segir að heimasíðu Félagsbústaða hafi verið breytt í kjölfar úrsagnar endurskoðanda og segir muninn á milli uppgjörsaðferða vera 57 milljarðar á árunum 2012-2019.
Hún bókaði um þetta í borgarráði í dag:
„Félagsbústaðir eru félagslegt úrræði ekki fjárfestingafélag. Búið er að breyta heimasíðu Félagsbústaða eftir að hörð deila um uppgjörsaðferðir félagsins varð opinber sem endaði á að einn nefndarmanna í endurskoðunarnefnd Reykjavíkur sagði sig úr nefndinni.
Þetta er hrein og klár blekking.
Það er blekkingarleikur og jafnvel ólöglegt að breyta heimasíðu opinbers félags. Var ekki nóg að eyða tölvupóstum í Braggamálinu? Hvað segir borgarskjalasafn um þetta.
Fyrir breytinguna var tekið fram á heimasíðu Félagsbústaða að félagið væri ekki rekið í hagnaðarskyni. Nú stendur „Félagsbústaðir eru stærsta þjónustufyrirtæki á leigumarkaði hérlendis með yfir 2.800 íbúðir til útleigu í Reykjavík. Félagsbústaðir er fyrirtæki í eigu Reykjavíkurborgar sem hefur það hlutverk að tryggja framboð af félagslegu leiguhúsnæði í borginni. Leiguhúsnæði Félagsbústaða er ætlað fjölskyldum og einstaklingum sem ekki hafa tök á að sjá sér fyrir húsnæði vegna lágra launa, þungrar framfærslu eða annarra félagslegra aðstæðna.“
Þetta er hrein og klár blekking. Mikið liggur undir því hér kemur fram að mismunurinn á uppgjörsreglum er 57 milljarðar frá árinu 2012 – 2019. Að auki stangast þetta á við samþykktir félagsins. Þar segir beinlínis: „Markmið félagsins er að starfa í þágu almenningsheilla“ en ekki að vera fjárfestingafélag.
Ekki þarf heldur lengi að skoða fréttatilkynningar til að sjá að félagið er ekki rekið í hagnaðarskyni.“
