Nú þegar jólin nálgast og fólk er komið á skrið í jólagjafainnkaupum er tilvalið að benda á nokkra hluti til að hafa í huga við kaupin. Munið t.d að fá skilamiða á gjafir, athugið gildistíma á gjafabréfum og ferðatíma á farmiðum.
Neytendasamtökin hafa á síðu sinni áhugaverða umfjöllun um ýmsa hluti sem gott er að hafa í huga varðandi jólagjafainnkaupin. Þar segir t.d að helstu vandræðin í tengslum við skil á jólagjöfum sé þegar útsölur hefjast og deilt er um hvort upphaflegt verð vörunnar eigi að vera á inneignarnótunni eða útsöluverð. Sú hefð hefur skapast að neytandi getur fengið upphaflegt verð vörunnar á nótuna en seljandi getur aftur á móti ákveðið að ekki megi nota nótuna fyrr en útsölu lýkur. Ekki eru til neinar reglur um skilafrest en verslanir ættu að gefa viðskiptavinum sínum rúman frest til skila.
Flugfélög bjóða gjarnan sérstök jólagjafabréf. Gjafabréfin geta verið á hagstæðu verði en það sem einkennir þau er að bókunartíminn er takmarkaður og það sama á við um ferðatímabilið. Þá getur sætaframboð einnig verið takmarkað. Ef ferðin er ekki farin á því tímabili sem skilmálarnir segja til um breytist jólagjafabréfið í hefðbundið gjafabréf eða inneign með takmarkaðan gildistíma. Fólki er því ráðlagt að skoða skilmálana vel fyrir kaup.
Geta gjafabréf runnið út?
Það er vinsælt að gefa gjafabréf í jólagjöf en það eru nokkur atriði sem bæði seljendur og neytendur ættu að hafa í huga. Flestar kvartanir sem Neytendasamtökin fá vegna gjafabréfa snúast um að seljendur neita að taka við gjafabréfi þar sem gildistíminn er liðinn. Segir á síðu samtakanna að Neytendasamtökin telji óeðlilegt að gildistími á gjafabréfi sé styttri en fjögur ár en það er almennur fyrningarfrestur á kröfum. Fólk er hvatt til að skoða gildistímann áður en fjárfest er í gjafabréfi og hika ekki við að gera athugasemdir og fara fram á lengri gildistíma ef svo ber undir. Hvað varðar inneignarnótur er algengt að gildistími sé eitt ár og gera Neytendasamtökin ekki athugasemd við það. Verslunin er í raun að veita neytanda meiri rétt en hann á skv. lögum með því að taka við ógallaðri vöru.
Sjá nánar á vef Neytendasamtakanna.
