Menn hjá SA hljóta að breyta um afstöðu í þessu máli.
Jón Örn Marinósson:
Ekki hefði ég trúað því að óreyndu að Samtök atvinnulífsins neituðu að taka þátt í því með heilbrigðisyfirvöldum og okkur landsmönnum öllum að sporna eins og kostur er gegn því að COVID-19 kórónuveiran dreifist svo hratt um landið að útbreiðsla hennar og alvarleg veikindi af hennar völdum verði nær óviðráðanlegt verkefni fyrir heilbrigðisþjónustuna. Menn eiga ekki að vera slíkar smásálir að vitna í einhver laga- eða kjarasamningsákvæði til að rökstyðja að þeim sé ekki skylt að liðsinna löndum sínum í þessari baráttu með því að greiða fólki laun sem er í sóttkví. Nóg hefur launafólk og íslenskir skattgreiðendur lagt fram að þessu til fyrirtækja í Samtökum atvinnulífsins þó að þau skorist ekki undan því þar á ofan að taka þátt í kostnaði vegna fyrirmæla heilbrigðisyfirvalda. Menn hjá SA hljóta að breyta um afstöðu í þessu máli.