Afhverju eru leikskólar og skólar lokaðir!

Katrín Baldursdóttir skrifar:

Það er alveg makalaust hvað Katrín Jakobsdóttir hefur fjarlægst allt sem getur tengst því að vera til vinstri í pólitík. Hún segir í þessu viðtali í dag að allt sé svo æðisleg á Íslandi: …“mikill tekjujöfnuður, góðir skólar, sterkir innviðir og gott heilbrigðiskerfi.“ En afhverju er þá láglaunafólkið í Eflingu í verkfalli og BSRB á leið í verkfall! Er það ekki bara vegna þess að láglaunafólkið hefur ekki séð meðaltölin frá OECD? Afhverju er svona slæmt ástand í heilbrigðiskerfinu! Er það bara lygi í fólki? Afhverju eru leikskólar og skólar lokaðir! Er það ekki bara vegna þess að láglaunafólkið er með heimtufrekju! Afhverju hafa svona margar konur í umönnunarstörfum bugast og eru búnar á sál og líkama um fimmtugt! Er það vegna þess að þær nota ekki fría sundkortið eða líkamsræktarkortið?

Í þessu viðtali í dag gaf hún algjöran skít í baráttu fólks í Eflingu, aðallega láglaunakvenna, fyrir því að geta dregið fram lífið og baráttu láglaunafólk í BSRB fyrir því að eiga í sig og á. En í sömu setningu og hún talaði um hvað allt væri æðislegt, sagði hún jafnframt: „En við þurfum líka einmitt að beina athygli okkar að því sem skiptir í raun og veru máli“.

Að sjálfsögðu brá henni að sjá myndbandið af hinu hroðalega ofbeldi á ungum dreng af erlendum uppruna. En Katrín er svo firrt að hún tengir ekki saman félagslegar aðstæður jaðarsettra hópa, fátækra og láglaunafólks við þær birtingarmyndir sem blasa við á Íslandi. Ofbeldi og einelti segja heilmikið til um það hvernig búið er að ungu fólki í dag. Það er veruleg firring að tengja ekki saman kjör og aðstæður láglaunafólks og jaðarsettra hópa við möguleika unga fólksins til að lifa heilbrigðu og góðu lífi. Ef þú býrð vel að fólki sem annast börnin okkar þá eykur það stórlega líkur á að þeim farnist vel. En það hentar ekki Katrínu að sjá samhengið.