Ég reikna því með að þurfa að hjökta út í Ég á raunar ekki grænan eyri en hef nú þegar haft samband við herra Hauck og frú Aufhäuser.
Jón Örn Marinósson skrifar:
Þar sem ég hef fengið mig fullsaddan af þessu eldriborgarabasli hef ég lagt drög að því að kaupa hlut í Íslandsbanka af Bjarna besta vin. Ég á raunar ekki grænan eyri en hef nú þegar haft samband við herra Hauck og frú Aufhäuser. Þetta er moldríkt indælisfólk og þau eru reiðubúin að „skaffa“ mér – gegn framvísun á félagsskírteini frá Félagi eldri borgara – nokkrar undirskriftir á kaupsamninga sem ég ætla að rétta Bjarna þegar hann opnar lúguna á sjoppunni. Nú skiptir auðvitað mestu máli að lenda ekki aftarlega í röðinni, á eftir ónefndum vinum og vandamönnum. Ég reikna því með að þurfa að hjökta út í Bjarnasjoppu kvöldið áður en hún verður opnuð morguninn eftir. Slík næturseta vex mér hins vegar ekki í augum eftir að ég beið í 12 klukkustundir framan við Dunkin Donuts á Laugavegi hér um árið. Óskið mér góðs gengis. Ég verð örugglega til viðtals um fyrirgreiðslu við eldri borgara eftir að Bjarni besti vin hefur selt mér ráðandi hlut í Íslandsbanka. Áfram, ellibelgir!