Á vefnum náttúran.is kemur fram að ríkisstjórn Hollands hafi bannað sölu á Roundup, illgresiseyðinum vinsæla. Löng barátta fyrir dómstólum liggur þar að baki og hvetur ríkisstjórn Hollands nú önnur ríki til að feta í fótspor sín til verndar jarðvegi og heilsu fólks til framtíðar. Segir í rökstuðningi að óháðar vísindalegar rannsóknir liggi banninu til grundvallar.
Roundup er ekki sértækt eitur öfugt við mörg eitur heldur er um að ræða breiðvirkan illgresiseyði, sem gerir lítinn greinarmun á illgresi og öðrum plöntum. Plöntur sem verða fyrir eitrun hætta að vaxa, missa græna litinn, blöðin krumpast og plönturnar drepast yfirleitt á nokkrum dögum. Það er talsvert notað hérlendis.
Roundup er framleitt af Monsanto fyrirtækinu sem fengið hefur á sig mikla gagnrýni vegna framkomu í umhverfismálum.
