Kristján Þór hafði sem sagt efni á að lækka veiðigjöldin hjá Samherja og öðrum útgerðarrisum en hafði ekki efni á að efla umhverfisrannsóknir í hafinu ásamt öðrum hefðbundnum rannsóknum.
Katrín Baldursdóttir skrifar:
Subbuskapur og svívirða einkenna uppsagnir Sigurðar Guðjónssonar forstjóra Hafró sem hann greip til eftir að Kristján Þór sjávarútvegsráðherra ákvað að skera allhressileg niður í fyrirhuguðum framlögum til stofnunarinnar. Sigurður hefur komið fram í fjölmiðlum og verið ótrúlega ánægður með sig í tilsvörum þrátt fyrir allar þessar uppsagnir. Bara eins og það væri ekkert mál að segja upp 10 manns og að fjórir skyldu hættu sjálfir. Það myndi ekkert koma niður á starfseminni eða þjónustunni.
Auðvitað var þetta ekkert svona eins og forstjórinn lýsti. Mannauðsstjórinn sagði ekki koma til greina að taka þátt í þessum uppsögnum og hætti sjálfur áður en til þeirra kom. Mannauðsstjórinn segir sjávarútvegsráðherra bera ábyrgð á þessum uppsögnum vegna niðurskurðar. Loforð um fjárveitingar hafi verið svikin. Kristján Þór hafi lofað 280 milljónum auka til haf-og matvælarannsókna en lækkaði það svo niður í 150 milljónir. Kristján Þór hafði sem sagt efni á að lækka veiðigjöldin hjá Samherja og öðrum útgerðarrisum en hafði ekki efni á að efla umhverfisrannsóknir í hafinu ásamt öðrum hefðbundnum rannsóknum.
Mannauðsstjórinn segir að uppsagnirnar hafi verið ýmist ólöglegar eða ósiðlegar og að 300 ára starfsreynslu hafi verið kastað á glæ. Og auðvitað er ekki verið að fara mannúðlega að uppsögnum. Mönnum sagt upp eftir 40 ára starf og: „Starfsmanni með skerta starfsgetu var sagt upp…“ Þetta er hinn hrollkaldi veruleiki þegar veikt fólk á í hlut. Svo á að klína í gegn starfsgetumati á veikt fólk sem síðan er sparkað þegar launafólki er hent út á gaddinn í sparnaðaraðgerðum ríkisvalds sem stýrt er leynt og ljóst af auðmönnum. Auðmönnum sem í græðgi vilja hrifsa sífellt meira til sín á kostnað þeirra verst settu í þjóðfélaginu. Með vitund og vilja ríkisstjórnarinnar.
Kristján Þór vissi vel af þessum uppsögnum og það læðist að manni sá grunur að Sigurður Guðjónsson hafi fengið eitthvað hressilegt fyrir sinn snúð því það var fullkomlega óeðlilegt hvað hann virtist sáttur, þegar hann svaraði fyrir þessar uppsagnir í fjölmiðlum.