Jóhann Hauksson fréttamaður skrifaði eftirfarandi „ferlisgreiningu“ Árna M. Mathiesen.
1. Árni Mathiesen var fjármálaráðherra Sjálfstæðisflokksins í hruninu.
Hann og fjölskylda hans höfðu hagnast verulega á hlutafélagavæðingu Sparisjóðs Hafnarfjarðar.
2. Árni hafði sem fjármálaráðherra mikil völd við að úthluta verðmætum sem Bandaríkjaher hafði ánafnað þjóðinni þegar herinn fór af landi brott 2006. Bróðir hans fékk hluta af þeirri þjóðareign.
3. Snemma árs 2007 átti Sjálfstæðisflokkurinn frumkvæði að því að hafnar yrðu viðræður við Landsbankann um stofnun útrásarfyrirtækja á vegum Orkuveitu Reykjavíkur og Landsvirkjunar. Þann 17. febrúar, liðlega tveimur mánuðum áður en Árni Mathiesen, þáverandi fjármálaráðherra, gekk frá framangreindri sölu á hlut ríkisins í Hitaveitu Suðurnesja, stofnaði Landsvirkjun útrásarfyrirtækið HydroKraft Invest í samstarfi við Landsbankann.
Aðeins 40 dögum síðar, 27. mars 2007, samþykkti stjórn Orkuveitu Reykjavíkur að stofna hlutafélag um útrásarstarfsemi, Reykjavik Energy Invest (REI). Flutningsmaður tillögunnar var Guðlaugur Þór Þórðarson, þáverandi stjórnarformaður OR og þingmaður Sjálfstæðisflokksins. Árni sem sagt innsti koppur í búri í þeirri fléttu.
4. Fáeinum fáeinum dögum fyrir jólin 2007 skipaði Árni Mathiesen, þáverandi fjármálaráðherra, Þorstein Davíðsson, son Davíðs Oddssonar, í embætti héraðsdómara. Árni hafði verið settur tímabundið í embætti dómsmálaráðherra til þess eins að ganga frá skipun í umrætt embætti. Enn á ný hafði Björn Bjarnason, þáverandi dómsmálaráðherra, vikið sæti sökum vanhæfi en Þorsteinn hafði unnið hjá honum í dómsmálaráðuneytinu.
Vorið 2011 var Árni dæmdur í Hæstarétti til þess að greiða Guðmundi Kristjánssyni hæstaréttarlögmanni á þriðju milljón króna í miskabætur og málskostnað. Guðmundur var meðal umsækjenda um héraðsdómaraembættið sem Þorsteinn hlaut og hafði verið metinn mjög vel hæfur ásamt tveimur öðrum umsækjendum.