Sprengisandur Bjarni Benediktsson, fjármálaráðherra og formaður Sjálfstæðisflokksins, sagði í þættinum Sprengisandur á Bylgjunni, að of langt hefði verið gengið í sameiningu ráðuneyta á síðasta kjörtímabili. Hann nefndi einkum velferðarráuneyti, sem tveir ráðherrar sinna nú, Kristján Þór Júlíusson og Eygló Harðardóttir og svo dómsmálaráðuneytið, sem þyrfti að vera sérstakt ráðuneyti, en ekki hluti af innanríkisráðuneytinu.
Bjarni sagði að velferðarráðuneuytinu mætti skipta í heilbrigðisráðuneyti og svo félags- og húsnæðismálaráðuneyti.
Hann sagði skoðanir sínar varðandi dómsmálaráðuneyti ekki mótast af þeirri stöðu sem nú er uppi. Aðspurður, einkum í ljósi þess að hann er eini löglærði ráðherrann, hvort hann muni taka að sér dómsmálin meðan innanríkisráðherra sinnir þeim ekki, sagðist hann hafa nóg á sinni könnu.
Bjarni útilokaði ekki að fenginn verði nýr ráðherra að málaflokknum, hann og Sigmundur Davíð Gunnlaugsson eigi eftir að ræða málið.
