Efnahagsmál „Ríkisreikningur fyrir árið 2013 er ekki enn kominn fram en ljóst er að þar stefnir í verulegan halla á rekstri ríkisins og langur vegur er að markmið fjárlaga fyrir það ár 
náist. Svo virðist sem innbyggður slaki sé sífellt til staðar í kerfinu hvað útgjöld ríkisins varðar og það virðist vera allt að því ófrávíkjanleg regla að útgjöld aukist frá því sem gert er ráð fyrir í fjárlögum. Sá útgjaldaauki nemur 12% að meðaltali á ári undanfarin 10 ár. Að sama skapi virðist nokkuð ljóst að áætlanir við fjárlagagerðina sjálfa eru oft ómarkvissar. Þannig segir Ríkisendurskoðun í nýlegu riti sínu að fjárlagagerðin virðist stundum ekki taka nægjanlega mikið tillit til atriða sem ættu að vera vel fyrirsjáanleg. Viðbrögð ýmissa forstöðumanna ríkisstofnana vísa líka í þá átt. Það virðist því ljóst að ekki er síður þörf á að vanda áætlanagerðina eins og að auka aðhaldið.“ Þetta segir í Hagsjá Landsbankans.“
Jafnframt segir: „Sú umræða sem nú fer fram um ríkisfjármálin og framúrkeyrslu ýmissa stofnana er í dálitlu ósamræmi við jákvæðar fréttir af greiðsluafkomu ríkissjóðs sem er mun betri nú um mitt ár en verið hefur..“
