Bjarni spilar inn á „ráðherraveiki“ þingmanna

Sá hroki sem lýs­ir sér í þess­ari af­stöðu þing­manna kann ekki góðri lukku að stýra.

Við lestur greinar Styrmis Gunnarssonar staðfestist enn og aftur hvert ástandið er innan Sjálfstæðisflokksins. Þingmennirnir eru ekki í miklum metum hjá ósáttum flokksfélögum.

„Í sum­um til­vik­um vilja þeir ekki „rugga bátn­um“ vegna óþæg­inda, sem þeir verða sjálf­ir fyr­ir, geri þeir það. Í öðrum til­vik­um, eins og þessa dag­ana í þing­flokki Sjálf­stæðis­flokks­ins, þegar val á nýj­um ráðherra er á döf­inni, vilja ein­stak­ir þing­menn, sem gera sér von­ir um þá ráðherra­stöðu, ekki ganga gegn vilja flokks­for­yst­unn­ar, og gera þær von­ir að engu með því.“

Auðvitað kann þetta að vera rétt. Það er ekki lítið að dröslast með ráðherradóm í maganum, jafnvel árum saman. Gamnið kann að kárna hjá þeim sem þannig er ástatt um.

Það er fleira sem ósáttir félagar hafa fundið frá þingmönnum flokksins. Það er hroki, ekki bara hroki, heldur ofurhroki.

„Sá hroki sem lýs­ir sér í þess­ari af­stöðu þing­manna kann ekki góðri lukku að stýra. Of­ur­hroki (hubris) hef­ur aldrei orðið til góðs. Og ekki ósenni­legt að fyrr en var­ir verði marg­ir þeirra utan þing­húss­ins en ekki inn­an og verða þá fljót­ir að skilja það, sem um er að ræða,“ skrifar Styrmir.

Hin harða Valhallardeila snýst um orkupakkann. „Orkupakka­málið kann því að verða til­efni til nýrr­ar bar­áttu fyr­ir mik­il­væg­um um­bót­um á okk­ar sam­fé­lagi, um­bót­um, sem knýja fram meira lýðræði en við höf­um þó búið við. Get­ur verið að þeim sem nú stefna mál­um í óefni á Alþingi sé ná­kvæm­lega sama, þótt slík upp­stokk­un verði í fram­haldi af þess­um umræðum? Það er erfitt að trúa því að svo sé.“

Styrmi þykir, þrátt fyrir erfiða stöðu í augnablikinu, ekki öll nótt vera úti: „En – kannski á orkupakka­málið eft­ir að leiða til meiri „bylt­ing­ar“ í íslenzkum stjórn­mál­um en nokk­urn mann hef­ur órað fyr­ir.“.