Sigurjón Magnús Egilsson skrifar:
Þórdís Kolbrún R. Gylfadóttir, ráðherra og varaformaður Sjálfstæðisflokksins, kallað trúlega yfir sig Staksteina morgundagsins, ef ekki leiðara, þegar hún, í Silfrinu, lýsti andstæðingum þriðja orkupakkans.
„Í Silfri RÚV í morgun var svo langt gengið í að saka andstæðinga orkupakka 3 um „einangrunarhyggju“ og jafnframt ýjað að andúð á útlendingum, að það verður ekki skilið á annan veg en þann, að þeir sem grípa til slíkra aðferða í skoðanaskiptum um umdeilt mál, telji sig standa mjög höllum fæti í þeim umræðum. Þeim virðist líða illa,“ skrifar Styrmir Gunnarsson vegna ummæla Þórdísar Kolbrúnar.
Ekki leikur minnsti vafi á að gjáin milli ráðherra og þingmanna og grasrótarinnar, einkum þeirra eldri þar, dýpkar stöðugt. Ekki er að sjá að fjölmiðlar hafi áhuga á að ná tali af Bjarna Benediktssyni vegna málsins. Sem er löngu tímabært.
Svo mörg orð, og hörð, hafa fallið að leið allra til baka verður torsótt. Spennandi verður að fylgjast með hvað stefnu ágreiningurinn tekur. Víst er að með framgöngu sinni í morgun hefur varaformaðurinn æst leikinn til muna.
