„Við horfum til þess að uppbygging fyrirtækisins í framtíðinni verði á Húsavík. Við höfum verið að samnýta fólk og komum til með að gera það í ríkari mæli þegar Vaðlaheiðargöng verða opnuð. Þá munum við samnýta bæði fólk og verkferla ennfrekar,“ segir Sigmundur Ófeigsson, framkvæmdastjóri Norðlenska, en aukin þungi á grunnframleiðslu fyrirtækisins mun færast frá Akureyri til Húsavíkur á næstu árum. Þetta kemur fram í netútáfu Vikudags.
Norðlenska hefur keypt húseignir útgerðarfélagsins Vísis á Húsavík, alls um 5 þúsund fermetra sem Norðlenska fær afhent í þessum mánuði. Tíu ára leigusamningur Norðlenska í húsakynnum þess á Akureyri rennur út í lok árs 2017. Sigmundur segir óvíst hvort leigusamningurinn verði endurnýjaður.
