Ágreiningur „Peningar sem Flokkur heimilanna átti að fá úr ríkissjóði, samkvæmt fjárlögum, runnu aldrei til Flokks heimilanna og situr nú Kristján Snorri Ingólfsson formaður Lýðveldisflokksins á fénu,“ segir í frétt á heimasíðu Útvarps sögu.
Þar segir að forsaga málsins sé sú að Lýðveldisflokkurinn og fleiri flokksbrot buðu fram undir merkjum Flokks heimilanna í síðustu þingkosningum. „Stjórn flokks heimilanna var í framhaldi kjörin og þar sem stutt var til kosninga var ákveðið að bjóða fram undir nafni Flokks heimilanna og nýta þá kennitölu sem Lýðveldisflokknum hafði verið úthlutað fyrir framboðið sem og listabókstaf þess flokks. Eftir kosningar hélt Kristján Snorri Ingólfsson formaður Lýðveldisflokksins því fram að stjórn Flokks heimilanna hafi ekki verið réttkjörin stjórn flokksins. Í framhaldinu leitaði stjórn Flokks heimilanna til fyrirtækjaskrár Ríkisskattstjóra og óskaði eftir að fá úr því skorið hvort
stjórn flokks heimilanna væri réttkjörin. Úrskurður Ríkisskattstjóra kvað á um að stjórn Flokks heimilanna væri rétt kjörin og því rétt að féð sem flokknum bar að fá samkvæmt lögum rynni til þess flokks.“
Eftir úrskurðinn snéri Kristján Snorri sér til iðnaðar- og viðskiptaráðuneytisins, sem sneri við ákvörðun Ríkisskattstjóra. Á síðu Útvarps Sögu segir að ekki hafi náðst í Kristján Snorra við vinnslu fréttarinnar, „… en hann er staddur á HM í Brasilíu.“
