YFIRSTÉTTIN TEKUR SÉR OFURLAUN!

Björgvin Guðmundsson skrifar:

Yfirstéttin á Íslandi hrifsar til sín ofurlaun en skammtar verkafólki lúsalaun, sem ekki er unnt að lifa af. Tilboð SA leiðir í ljós, að áfram á að halda launum verkafólks niðri. Forsætisráðherra er með rúmlega 2 millj. kr. í laun á mánuði. Við það bætast mikil hlunnindi og aukagreiðslur, sem jafngilda mörg hundruð þúsund á mánuði. Laun þessa ráðherra eru 7-föld verkamannalaun!

Aðrir ráðherrar eru með 1,8 milljón á mánuði fyrir utan mikil hlunnindi. Þingmenn eru með 1,1 milljón kr á mánuði fyrir utan gífurlegar aukagreiðslur. Formenn flokka og forseti alþingis hafa 50% álag á þingfararkaup; hafa því 1650 þús. á mánuði. Formenn nefnda og varaforsetar þings hafa 15 % álag á þingfararkaup fyrir að stýra nefndunum.

Síðan hafa þingmenn alls konar styrki akstursstyrki, ferðastyrki, húsnæðisstyrki, skrifstofustyrki, símastyrki, o.s.frv., o.s.frv. Bruðlið er endalaust. Skattgreiðendur borga.

Laun bankastjóra stóru bankanna eru yfirgengileg. Bankastjóri ríkisbankans, Landsbankans, Lilja Björk Einarsdóttir er með 4,4 millj. kr. á mánuði í heildarlaun, bankastjóri Íslandsbanka, Birna Einarsdóttir er með 5,3 mills kr. í heildarlaun á mánuði og bankastjóri Arion banka, Höskuldur Ólafsson, er með 6,2 millj. á mánuði í heildarlaun. Bankastjóri einkabankans er með hæstu launin enda þótt afkoma Arion banka hafi verið verst af stærstu bönkunum.

Það segir sína sögu og hvert stefnir, ef bankarnir yrðu einkavæddir.

Laun yfirstéttarinnar hafa verið að hækka og þróunin í þeim efnum minnir óþægilega mikið á þróunina fyrir bankahrunið. Þá voru bankastjórar raunar með miklu hærri laun en báru samt enga ábyrgð, þegar til kastanna kom.

Atvinnurekendur með stuðningi ríkisstjórnarinnar vilja nú skammta verkafólki 345-360 þúsund kr á mánuði eftir 3 ár, 315-320 þúsund við undirskrift samninga. Það eru 247-250 þúsund kr. eftir skatt við undirskrift. Á því á verkafólk að lifa. BB tekur illa í skattalækkanir, sem gagn er í.