Það er virkilega sárt að sjá kjörna fulltrúa VG teymda áfram af Sjálfstæðismönnum í að styðja ofbeldismenn til valda.
Sóley Tómasdóttir, sem var borgarfulltrúi Vinstri grænna er ekki sátt með viðbrögð flokksins vegna Klaustursmálsins. Hún skrifar:
„Klaustursmálið vakti mikla og verðskuldaða reiði meðal þjóðarinnar. Mjög margir kjörnir fulltrúar brugðust við og fordæmdu framferði þingmannanna, ýmist í fjölmiðlum eða á vettvangi Alþingis. Einhver vinna hefur farið fram í forsætisnefnd þingsins, en að öðru leyti virðast önnur „og mikilvægari“ mál nú eiga hug þingheims.
Minn gamli flokkur, VG, veldur mér sárum vonbrigðum með því að láta Rósu standa eina á móti straumnum í þessu máli og með því að vera ekki með samræmd viðbrögð við endurkomu klaustursmanna. Það er virkilega sárt að sjá kjörna fulltrúa VG teymda áfram af Sjálfstæðismönnum í að styðja ofbeldismenn til valda. Það er sorglegt að ríkisstjórnarflokkarnir hafi ekki sammælst um að standa saman gegn ofbeldismönnum inni á Alþingi. Ef ekki með því að kjósa með vantrausti á Bergþór, þá með einhverjum öðrum hætti sem sýnir þjóðinni, konum og jaðarsettum hópum þann sóma sem þeim ber eftir allt sem á undan er gengið.
Í raun kemur þetta mér svo sem ekki mikið á óvart. Kvenfrelsisáherslur VG hafa alltaf verið byggðar á að örfáir einstaklingar þori að standa á móti straumnum þegar á reynir. Restin talar vissulega um kvenfrelsi, en yfirleitt á tyllidögum og algerlega án þess að styggja eða leggja til raunverulegar aðgerðir til breytinga. Viðbrögðin við Klaustursmálinu eru því mjög dæmigerð. Því miður.“
