„…þar á meðal VG liðar sem þó eru í flokki sem hefur samþykkt á landsfundi að ekki skuli fjármagna vegakerfið með vegaskatti.“
„Á fundi Umhverfis og samgöngunefndar í morgun greiddu stjórnarliðar (án Rósu Bjarkar) ásamt klausturmönnunum Karli Gauta og Bergþóri atkvæði gegn tillögu minni að farið yrði í kosningu um formann nefndarinnar. Studdu þau frávísunartillögu Jóns Gunnarssonar sjálfstæðismanns og að því er virðist sérstaks stuðningsmanns Bergþórs í stóli formanns,“ þannig skrifar Helga Vala Helgadóttir.
Hún lagði sem sagt fram tillögu um að nefndin kysi sér nýjan formann í stað Bergþórs Ólasonar.
„Stjórnmálin geta á köflum verið undarleg,“ segir Helga Vala um þessa niðurstöðu. Það er meira eftir:
„Þá greiddu allir stjórnarþingmenn ásamt formanninum Bergþóri Ólasyni með tillögum Jóns Gunnarssonar um vegaskatt, þar á meðal VG liðar sem þó eru í flokki sem hefur samþykkt á landsfundi að ekki skuli fjármagna vegakerfið með vegaskatti. Þessar tillögur voru afgreiddar út úr nefndinni á fimm mínútum í lok fundar, án umræðu.“
Svo segir Helga Vala.
„Mér þykir þetta allt saman vera hið sérstakasta mál og skil eiginlega alls ekki hvers vegna stjórnarmeirihlutinn hefur nú ákveðið að slá skjaldborg um Bergþór.“
