Lára V. Júlíusdóttir, sem er lögmaður Kristjönu Valgeirsdóttur, fjármálastjóra Eflingar, hefur áður blandast í líf Sólveigar Önnu Jónsdóttur, formanns Eflingar. Saman hugsa þær Lára og Kristjana hvort Gunnar Smára verði stefnt vegna ummæla sem hann lét falla.
„Lára V. Júlíusdóttir, lögmaður fjármálastjóra Eflingar, skrifar langan texta um að fjármálastjórinn sé ósátt við að ég hafi skrifað um kaup Eflingar á veitingum af fyrirtæki sambýlismanns hennar og fjárfestingum í Gamma með fjármunum félaga í Eflingu. Og að ég hafi birt á Facebook myndina af fjármálastjóranum sem finna má á vef Eflingar, sem sé að hafa birt opinberlega opinbera mynd. Og ýjar að því að þær tvær séu að hugsa um, íhuga og velta fyrir sér málsókn vegna þessa, ekki vegna þess að þær haldi að eitthvert tilefni sé til málsóknar heldur vegna þess að þær vita sem er að fjölmiðlar gera ekki meira kröfur til sín en svo, að þeir muni birta þessa yfirlýsingu undir fyrirsögnum sem gefa til kynna stórkostleg brot mín,“ skrifar Gunnar Smári.
En bökkum aðeins. Gunnar Smári bætir við:
„Lára V. Júlíusdóttir var sérstakur saksóknari í ákæru á hendur níumenningunum sem ákærðir voru fyrir brot gegn valdstjórninni, almannafriði og allsherjarreglu í búsáhaldabyltingunni. Meðal ákærðra var Sólveig Anna Jónsdóttir, núverandi formaður Eflingar. Lára fór fram á hámarksrefsingu, en refsing við því sem ákært var fyrir er samkvæmt lögum eitt ár að lágmarki en allt að ævilöngu fangelsi. Síðast þegar Lára og Sólveig áttu við vildi Lára því fá Sólveigu Önnu dæmda í ævilangt fangelsi. Svolítið blóðþyrst, þessi Lára.“
