Farðu annað með svona dólgapopúlisma

„Við eigum mikið undir að allir aðilar rísi undir þeirri ábyrgð,“ er mat Árna Páls Árnasonar, fyrrverrandi formanns Samfylkingar, þingmanns og ráðherra, um áhrifin af lestri skýrslu Gylfa Zoëga, fyrir ríkisstjórnina.

Árni Páll segir um Gylfa og skýrsluna: „Hann bendir á hætturnar sem við stöndum nú frammi fyrir, að við getum með innistæðulausum kauphækkunum og útgjaldaaukningu ríkissjóðs veikt samkeppnisstöðu útflutningsgreina og ofnýtt þá auðlind sem ferðamenn eru, með sama hætti og við ofnýttum síldina 1968 og lánshæfismat ríkisins fyrir hrun.“

Og svo þetta: „Þessi skýrsla og það samráð sem Katrín Jakobsdóttir hefur efnt til við aðila vinnumarkaðarins í aðdraganda næstu kjarasamninga skapar nú aðrar forsendur til töku skynsamlegra ákvarðana.“

Guðmundur Gunnarsson hrífst ekki af málflutningi Árna Páls: Fíllinn er sjálftaka ykkar á 45% launahækkun og hræsni ykkar núna með áskorunum um að halda aftur af þeim launalægstu er hreint út sagt ógeðfelld.“

Árni Páll Árnason var ekki skemmt og vildi reka Guðmund af sínu svæði á Facebook: „Ég hef engin laun tekið mér og frábið mér svona orðfæri. Haltu þig annars staðar með svona dónaskap.“

Guðmundur Gunnarsson gafst ekki upp: „Æi Árni minn það er gríðarleg reiði í garð ykkar stjórnmálamanna í röðum launamanna. Útspil ykkar eru einfaldlega ekki boðleg, og svo sem skiljanlegt er að þú þolir ekki að heyra þetta. Taki þið stjórnmálastéttin þetta ekki til athugunar nú um leið og þing kemur saman þá verða harkaleg átök og það mun ekki ganga upp hjá ykkur að reyna koma sök á launamenn eins og þú ert að reyna með þessu inneggi.“

Nú þykknaði í Árna Páli: „Ég er bara ekki hluti af neinni „stjórnmálastétt“ og frábið mér svona tal. Farðu bara annað með einhverjar svona dólgapopúlisma. Ég hef engin útspil átt nema að deila þessari hvatningu um skynsamlegt samtal.“

Unnið af Facebooksvæði Árna Páls Árnasonar.