Vigdís Hauksdóttir, borgarfulltrúi Miðflokksins, dró til baka tillögu sína um afnám byggingaréttargjalds á félagslegt húsnæði.
Öllum öðrum tillögum minnihlutans var vísað í borgarrás eða til nefnda. Vigdís bókaði eftirfarandi:
„Á borgarstjórnarfundi í dag birtist grímulaust að lýðræðið er af skornum skammti á þeim vettvangi. Skipti engu máli hvaða tillögur stjórnarandstaðan lagði fram til efnislegrar afgreiðslu, var þeim ýmist vísað inn í borgarráð eða til nefnda borgarinnar á grunni málsmeðferðartillagna til þess eins að koma þeim undir trúnað, leynd og ekki síður til að gera út um þær.
Á þessum grunni dreg ég þessa tillögu til baka til að hún sofni ekki inn í borgarráði eins og aðrar tillögur sem þangað hefur vísað í dag og á undanförnum árum.“
Á borgarstjórnarfundinum í gær kom Dagur B. Eggertsson borgarstjóri með „málsmeðferðtartillögu“ við allar tillögur minnihlutans, nema tillögu Vigdísar sem var dregin til baka. Eftir að framsögumenn höfðu kynnt tillögur sínar bað Dagur alltaf um orðið og vísaði málunum frá borgarstjórn. Fulltrúar meirihlutans sögðu mjög fátt en samþykktu allar afgreiðslur Dags.
Staða borgarstjórnar er furðuleg. Hún er varla málstofa, þar sem meirihlutinn sér til þess að öllum tillögum er vísað annað. Vigdís segir það gert; „…til þess eins að koma þeim undir trúnað, leynd og ekki síður til að gera út um þær.“
