Alþingi bjó til „ömurlegt kerfi“

Hvað er hægt að segja eftir lestur tveggja frétta í Fréttablaðinu, frétta sem sýna hvernig vilji Alþingis skaðar fólk sem á sér einskis ills von? Ekki má gera ráð fyrir að lögin séu einsog þau eru, nema vegna þess að ætlunin var að hafa þau með þessum hætti.

Í annarri fréttinni er eldri manni, sem missti eiginkonu sína, gert að endurgreiða ríkinu ofgreiddan lífeyri konunnar. Í hinni fréttinni segir frá tveimur ungmennum, sem misstu föður sinn, og verða að taka lán til að greiða skattaskuld hins látna föður. Það hefur mikil áhrif á fjárhagsstöðu þeirra og truflar skólagönguna.

Í Fréttablaðinu segir Þuríður Harpa Sigurðardóttir, formaður Öryrkjabandalagsins: „Eins og staðan er í dag þá skerða allar skattskyldar tekjur örorkulífeyri. Í mínum huga þá finnst mér þetta afskaplega óréttlátt,“ segir Þuríður Harpa Sigurðardóttir, formaður Öryrkjabandalags Íslands. „Mörgum finnst þetta nánast eignaupptaka. Við vinnum ævina alla og borgum í lífeyrissjóð og síðan hirðir ríkið það allt til baka. Við búum hreinlega við ömurlegt kerfi.“

Þar segir Sigurður Jónsson varaformaður Landssambands eldri borgara: „Þetta er skelfilegt mál.“

Skoðum aðeins betur frétt úr Fréttablaðinu: „Kona mannsins hafði greinst með ólæknandi krabbamein sem hafði áhrif á hreyfigetu konunnar. Mat sérfræðinga og umönnunar­aðila var að húsnæði hjónanna hentaði heilsu hennar illa. Því afréðu þau að selja eign sína og flytja í raðhús. Árið 2016 lést konan af veikindum sínum og hentaði húsið manninum illa. Ákvað hann að selja raðhúsið og kaupa sér annað. Það hafði í för með sér að fjármagnstekjur hjónanna breyttust frá upphaflegri áætlun og konan fékk of háar bætur greiddar síðustu ævidagana. Maðurinn kærði afstöðu TR til úrskurðarnefndar í velferðarmálum.“

Ekki var mikið á því að græða: „Þrátt fyrir að um ófyrirséða atburði hafi verið að ræða þá telur [ÚRV] að slíkt geti ekki leitt til þess að vikið verði frá skýrum ákvæðum laga […] um almannatryggingar,“ segir í niðurstöðu nefndarinnar,“ segir í Fréttablaðinu.