„Gera þarf heilbrigðisstéttum kleift að stunda sjálfstæðan rekstur,“ segir í stjórnmálaályktun landsfundar Sjálfstæðisflokksins.
Þar segir einnig að Sjálfstæðisflokkurinn vilji ljúka byggingum sem eru komnar af stað á lóð Landspítalans og tengist núverandi starfsemi. Síðan á að kúvenda:
„Farið verði tafarlaust í staðarvalsgreiningu fyrir framtíðaruppbyggingu sjúkrahúsþjónustu,“ segir í ályktuninni. „Bregðast þarf við vaxandi þörf fyrir heilbrigðisstarfsfólk,“ segir þar og svo þetta: „Mikilvægt er að horfa til fjölbreyttra rekstrarforma í heilbrigðisþjónustu með það að markmiði að auka aðgengi, þjónustu, skilvirkni og hagkvæmni með áherslu á skýrar gæðakröfur. Gera þarf heilbrigðisstéttum kleift að stunda sjálfstæðan rekstur.“
