Laun þingmanna tengist launum forseta ASÍ
Mærir Ásmund Friðriksson sem hann segir virkan og duglegan þingmann.
„Hvers vegna ekki að ákveða að laun alþingismanna skuli aldrei vera lægri en laun forseta Alþýðusambands Íslands og um þá gildi sömu reglur og forseta ASÍ hvað varðar hlunnindi o.þ.h.? Þannig væri komið viðmið við þann sem gæta á hagsmuna almenns launafólks.“
Þannig skrifar þingflokksformaður Miðflokksins, Gunnar Bragi Sveinsson, í Mogga dagsins. Fyrr í greininni varði hann gerðir Ásmundar Friðrikssonar og mærði hann fyrir dugnað. Að auki sagði: „Gallinn við starfskjör alþingismanna er að þau eru of flókin í mörgum tilfellum, þ.e. of margar aukagreiðslur.“
Hann segir að einfalda verði og bæta starfskjör alþingismanna. „Alþingismaður er ráðinn tímabundið til fjögurra ára (skemur undanfarið!).“
Gunnar Bragi endar skrif sín svona: „Ég er því afar ósammála þeim sem blöskrar starfskjör alþingismanna. Miðað við vinnuna og starfsaðstæður. Það má hins vegar einfalda starfskjörin og gera þau gegnsærri en um leið þarf að bæta þau. Ég held reyndar að víða í stjórnkerfinu megi finna fólk með umtalsvert betri starfskjör en þeir sem vinna við löggjafarsamkomuna.“
En hér kemur loka setningin í innleggi Gunnars Braga: „Hugmyndin með forseta ASÍ er kannski ekki svo vitlaus?“
-sme
