Leiðari Flokkarnir tveir, Sjálfstæðisflokkur og Vinstri græn, sem mynda núverandi ríkisstjórn, ásamt Framsóknarflokki, eru ekki eins líkir og forystufólk þeirra vill vera láta. Komið er babb í bátinn.
Formaður Sjálfstæðisflokksins boðar skattalækkanir í Mogganum í dag. Hann kýs samt að segja sem minnst. Forveri hans á stóli formanns notar leiðara dagsins til að hvetja eftirmanninn sinn til dáða í skattalækkunum. Sem hann mun eflaust taka alvarlega.
Í Fréttablaðinu hikar næstráðandi VG ekki eitt andartak þegar hún, Svandís Svavarsdóttir, boðar stórsókn í skattahækkunum. Meðal annars vill hún endurvekja sykurskattinn. Skattinn sem Bjarni gerði að forgangsverkefni að leggja af, þegar hann komst í fjármálaráðuneytið í fyrra skiptið.
Þrátt fyrir vinskapinn og væntumþykjuna milli formannanna virðast gárur vera komnar á áður slétt yfirborðið.
Ekkert er vitað um afstöðu Framsóknar til átaka stjórnarflokkanna tveggja.
Sigurjón M. Egilsson.
