Leiðari Enn gráta Mogginn og Bjarni Ben steindauða ríkisstjórn Bjarna. Ríkisstjórn sem sló öll met í óvinsældum og vantrausti frá kjósendum. Þó ekki sé minnst að samstöðuleysi innan þingflokks Sjálfstæðisflokks. Þar hafði ríkisstjórnin ekki stuðning við eigið fjárlagafrumvarp.
Ríkisstjórn Bjarna Benediktssonar var veik frá fyrsta degi og hægt og bítandi veiktist hún og var svo komið að siðferðisvitund ráðherra Sjáflstæðisflokksins, og hið minnsta einstakra þingmanna, var allt önnur og órafjarri því sem bakland Bjartrar framtíðar gat sæst á. Ætli ámóta bakland Sjálfstæðisflokksins nefnist ekki miðstjórn.
Davíð Oddsson grípur til viðtals Viðskiptablaðsins við Bjarna, þegar hann skrifar leiðara dagsins.
„…heldur sýnist mér grasrótin hafa tekið yfir og samþykkt, án nokkurrar viðleitni til að setjast yfir hlutina og ræða málin, að slíta stjórnarsamstarfinu. Þetta er einhver furðuleg blanda af reynsluleysi og ábyrgðarleysi, en ég hafði ekki haft á tilfinningunni að þau væru að leita að útgönguleið,“ segir Bjarni.“
Bæði Bjarni og Mogginn gleyma, og það eflaust viljandi, að það var ekkert líf í ríkisstjórn Bjarna Benediktssonar. Dauðinn var óumflýgjanlegur. Ákvörðun Bjartrar framtíðar flýtti augljósum dauða óvinsælustu ríkisstjórnar íslandssögunnar. Annað ekki.
Sigurjón M. Egilsson.
