„Ég er nú bara strákur úr Breiðholtinu og óþarfi að láta þessum látum gagnvart mér,“ þannig biðst Karl Pétur Jónsson, aðstoðarmaður Þorsteins Víglundssonar, vægðar á Facebook eftir að hann hafði dásamað ríkisstjórnina fyrir frammistöðuna í velferðarmálum.
Jón Viðar Jónsson gagnrýnandi hafði byrjað gagnrýni á Viðreisn, ekki síst fyrir framgöngu í velferðarmálum.
„Sæll Jón Viðar. Hverju vilt þú breyta í velferðarmálum? Hvað er það sem okkur yfirsést? Og ég bið þig að tala af ábyrgð og taka tillit til þess að málaflokkurinn hefur aldrei notið jafn mikilla hækkana á framlögum úr ríkissjóði eins og á árabilinu 2016-2020,“ skrifar Karl Pétur.
Þar með kallaði hann yfir sig Halldóru Eyfjörð sem var allt annað en sátt við orð aðstoðarmannsins. „Karl Pétur Jónsson sorry en hvað ertu að tala um velferðarkerfið er í molum, bætur til örykja og aldraðra eru skammarlegar, heilbrigðiskerfið í molum. Ég sem öryrki fæ einhverja þúsunkalla í hækkun miðað við fjárlögin 2016-2020. Halló ég vil breyta ansi miklu, krónu á móti krónu lífeyrisjóðir stela af gamla fólkinu sparnaðnum, halló það er af nógu að taka þegar talað er um breytingar.“
Síðan halda skoðanaskiptin áfram og Karl Pétur telur berst að verjast. „Ég er nú reyndar í fríi, ella hefði ég ekki haft tíma til að ræða málin við þig.“
„Gott að vita að þú ert í fríi, ykkur veitir sjálfsagt ekkert af nýsestum að völdum,“ skrifar Jón Viðar.
Að endingu koma þessi skrif frá Karli Pétri: „Ég er nú bara strákur úr Breiðholtinu og óþarfi að láta þessum látum gagnvart mér.“
Halldóra svarar honum: „Og ég er nú bara stelpa úr Eyjum vinur en það skýn í gegn vanvirðing vinur , satt að segja fanns mér ég alveg nógu málefnaleg , talaði bara íslensku sem við flest skiljum.“
-sme
