Ríkislögreglustjóri er bæði rasisti og fasisti

Hallfríður Þórarinsdóttir, sem er doktor í mannfræði, bregst hart við þessum orðum Haraldar Johannessen ríkislögreglustjóra:

„Við erum með samfélag sem er samsett af miklum fjölda erlendra borgara, bæði þeirra sem starfa hér og dvelja hér, ferðamenn, hælisleitendur og svo framvegis. Þannig að samsetningin hér á hverjum tíma af því fólki sem er í landinu hefur breyst mjög verulega undanfarin tíu, fimmtán ár.“

Hallfríður skrifar á Facebook: „Þetta eru orð Ríkislögreglustjórans Haraldar Johannessen, sem er augljóslega bæði rasisti og fasisti. Úthúðar fólki af erlendum uppruna og gerir það að blórabögglum í hugsanlegum og meintum glæpum. Ætlar að setja sérsveit lögreglunnar, óeirðalögguna á vakt á sjálfan þjóðhátíðardaginn.“

Hallfríður skrifar skömmu síðar: „Ég hef unnið með innflytjendum og rannsakað samfélag innflytjenda og þátttöku innflytjenda í íslensku hagkerfi og samfélagi, framlag þeirra er ómælt. Að sjálfsögðu á að setja fræðslu um margbreytileikann inn í allt nám, lögreglu, kennara, lækna, lögfræðinga og allra. Við búum saman. Íslensku samfélagi stafar meiri ógn af hugmyndum og aðgerðum Ríkislögreglustjóra en þátttöku innflytjenda í íslensku samfélagi.“

Líta á útlendinga sem glæpamenn

Síðastliðið haust var Hallfríður í viðtali hjá Rúv, og sagði þá: „Mér finnst þetta eiginlega lýsa þeim gamla þankagangi sem ég hélt að væri liðinn undir lok, þetta að líta á útlendinga sem fólk sem er glæpamenn þar til annað sannast, þeir eru alltaf undir grun um að hafa eitthvað óhreint mjöl í pokahorninu. Að vera ekki heiðarlegir, koma ekki fram af heilindum, en í raun og veru segir þetta allt um vinnuveitendurna en ekki um fólkið sjálft.“

Hún sagði mikilvægt að skoða þessi mál. „Svona hegðun á að vekja okkur til umhugsunar um hvernig viðhorf eru ríkjandi. Því ef þetta er svona með börn sem þarf að sækja í leikskóla , hvað þá bara almennt um viðhorf vinnuveitenda til erlendra starfsmanna á íslenskum vinnumarkaði. Þeir eru nú hvorki meira né minna en 10% af öllum starfandi.“

Reiður vinnuveitandi

Tilefni viðtalsins við Hallfríði var að Anna Margrét Ólafsdóttir, leikskólastjóri Nóaborgar í Reykjavík fékk símtal frá reiðum vinnuveitanda sem hellti sér yfir hana vegna þess að senda þurfti barn starfsmanns hans heim úr leikskólanum vegna manneklu.

Eftir símtalið rifjaðist upp fyrir henni að þetta væri ekki í fyrsta skipti sem hún fengi slíkt símtal en alltaf kæmu þau frá vinnuveitendum foreldra barna af erlendum uppruna. Anna Margrét skrifaði um málið á Facebook-síðu sinni og fékk mikil viðbrögð. Aðrir leikskólastjórar hafa sett sig í samband við hana og haft sömu sögu að segja.

Myndin er í eigu Ríkisútvarpsins.