Lilju Dögg svipar til föður síns

Orðaskak Lilju Daggar Alfreðsdóttur, varaformanns Framsóknarflokksins, og Jónu Sólveigar Elínardóttur, varaformaður Viðreisnar og formanns utanríkismálanefndar þingsins, ratar víða.

Össur Skarphéðinsson, sem er fyrrverandi utanríkisráðherra líkt og Lilja Dögg, lét málið til sín taka og skrifar á Facebook um orðaskakið. Össur mærir Lilju Dögg.

Leti Sigmundar Davíðs

Össur segir að hirting sé vísast orðið; „…sem má nota um meðferð Lilju Daggar Alfreðsdóttur á annars ágætum og upprennandi þingmanni Viðreisnar í fréttum RÚV í hádeginu. Maður sá stundum svona takta í borgarstjórn fyrr á árum þegar þar var á dögum klóbeittur fulltrúi Framsóknar sem yfirleitt lét menn í friði nema hann væri áreittur. Lilja er annars einn örfárra þingmanna, og sá eini nýi, sem virðist hafa pólitískt bit. Sigmundur Davíð býr að vísu yfir burðum til að snúa þinginu á hvolf hvenær sem hann vill en það er einsog hann nenni því ekki. Það er ekki óhugsandi að Framsókn fikri sig upp á skynsemdarrófinu og þá er einungis tímaspursmál hvenær Lilja verður formaður.“

Áfram eyðilegging í Framsókn

Lilja sagði það vera með al­gjörum ólík­ind­um, að for­maður utan­rík­is­mála­nefndar, þ.e. Jóna Sólveig, hafi komi í pontu og gert; „…hrein­lega lítið úr stefnu utan­rík­is­ráð­herra þjóð­ar­innar hvað þennan mála­flokk varð­ar. Væri ekki miklu heið­ar­legra af Við­reisn að segja sig frá þessu rík­is­stjórn­ar­sam­starfi? Mér finnst þetta óboð­leg­t.“

Jóna Sólveig notar einnig Facebook: „Er varaformaður Framsóknarflokksins að slá ryki í augu fólks með tilefnislausum yfirlýsingum sem þessum til þess að draga athyglina frá stórkostlegum innanhúsátökum Framsóknarflokksins? Er það líka ekki svo að það er í raun meiri ágreiningur innan Framsóknarflokksins sjálfs heldur en í ágætu samstarfi ríkisstjórnarflokkanna?
Framganga varaformanns Framsóknar í ræðustól Alþingis í morgun ber þess vitni að hún sé örvæntingarfull. Ekki af ástæðulausu enda flokkurinn hennar í rústum og sá armur sem hún tilheyrir – armur Sigmundar Davíðs – vinnur markvisst að því að halda eyðileggingarstarfinu áfram. Það er öllum dagljóst að flokkurinn er óstjórntækur eins og sakir standa og verður það amk. þar til leiðtogakrísan hefur verið leyst.“