„Kannski að ríkissaksóknari þurfi að skoða þetta?“

Samfélag Mjög áhugavert er að sjá hvernig fákeppnisfyrirtæki eru að færa sig upp á skaftið og eru farin að beita beinum og óbeinum kúgunum. Þau greinilega hagnast ekki nóg og vilja fá ríkisstuðning til að hagnast meira.

Vel er þekkt hvernig fyrirtæki í eigu skyldmenna fyrrverandi fjármála- og efnahagsráðherra töldu sig eiga rétt á einhverju frá ríkinu. Nýr fjármála- og efnahgasráðherra virðist líka eiga skyldmenni, sem telja sín fyrirtæki eiga rétt á fyrirgreiðslu.

Almenningur, þ.e. neytendur, eru skotmarkið. „Ef ríkið stígur ekki inni í, þá verður skortur á…“ Þið getið sett allt mögulegt í staðinn fyrir punktana þrjá, en nánast undantekningarlaust, þá tengist varan eða þjónustan fákeppnisfyrirtækjum.

Forstjóri ónefnds fyrirtækis…

Af hverju á ríkið að taka á sig kostnað af birgðarhaldi á olíu, lyfjum, áburði eða hvað það nú sem þeim dettur í hug næst? Er ekki sú kvöð að eiga nægar birgði komin vegna þess að það er ekki frjáls samkeppni og ef það lítur út fyrir að frjáls samkeppni sé að myndast, þá er hún drepin með uppkaupum, undirboðum eða eins og töfrasprota sé veifað, þá eykst þjónustustigið langt umfram það sem nokkrum sinum hefur verið í boð. Nú Samkeppniseftirlitið situr hjá og gerir ekki neitt.

Forstjóri ónefnds fyrirtækis, en hann virðist vera orðinn talsmaður allra annarra fyrirtækja í greininni, hefur minnst tvisvar á undanförnum mánuðum stigið fram og verið með hótanir. Varan, sem fyrirtækið mitt selur, verður ekki alltaf til nema ríkið greiði fyrir birgðarhald. Þetta heitir á mínu máli, fjárkúgun og fjárkúgun telst til brota á hegningarlögum. Kannski að ríkissaksóknari þurfi að skoða þetta? Það er, jú, verið að beita ríkið fjárkúgun og um leið alla neytendur í landinu. Óþarfi er að taka það fram, að fyrirtæki umrædds forstjóra á alveg borð fyrir báru, en mikill vill meira.

Greinin birtist fyrst á Facebooksíðu Marinós. Hún er birt hér með góðfúslegu leyfi höfundar.