Sólveig Anna Jónsdóttir skrifar:
43,2% Eflingarkvenna eiga erfitt eða mjög erfitt með að ná endum saman. 17,3% Eflingarkvenna hafa þurft að fá fjárhagsaðstoð frá sveitarfélagi, vinum, hjálparsamtökum og/eða mataraðstoð um borð í þessu Covid-skipi sem við siglum víst öll saman í. 33,8% Eflingarkvenna geta ekki mætt óvæntum útgjöldum. 25,9% Eflingarkvenna hafa ekki ráð á því að fara í árlegt frí með fjölskylduna sína. 22,3% Eflingarkvenna hafa á síðustu 5 árum farið einu einni eða aldrei í frí sem var lengra en 2 vikur. Aðeins helmingur Eflingarkvenna býr í eigin húsnæði. 41,4% Eflingarkvenna eru að takast á við slæma andlega heilsu. 21,5% Eflingarkvenna eru að glíma við slæma líkamlega heilsu. 57,3% Eflingarkvenna hafa neitað sér um heilbrigðisþjónustu um borð í HMS Við Erum Öll Í Þessu Saman.
En vitiði Eflingarkonur, að græðgi ykkar er skaðvaldur íslensks efnahagslífs. Græðgi ykkar er ónáttúrleg. Hún potast upp í gegnum fallega hirta grasflöt raunveruleika Þorsteins, líkt og viðbjóðslegur gróður frá annarri plánetu, svona ógeðsleg skriðjurt sem vefur sig um fætur saklauss fólks. Hún lekur niður veggi hýbýla Þorsteins, eins og hræðilegur slím-frymisþráður úr annarri vídd sem rennur yfir og svelgir upp alsaklaust fólk. Hún birtist eins og mistur í bíltúr Þorsteins á fallegum sveitavegi; út úr skóginum líður hún og hylur og hjúpar, allt verður óskýrt og óhuggulegt, og á eftir henni kemur ókindin, gráðug, svo hryllilega gráðug í kjams og nag á saklausu fólki. Hún frussast eins og sameindasýra úr xenomorph drottningu, eins og martröð vöknuð til lífsins, sem tærir í sundur veruleika og náttúrulögmál, sjálft þyngdarlögmálið.
Já, Eflingarkonur. Ef aðeins þið væruð ekki stjórnlausar, hömlulausar, marklausar. Agalegar, hræðilegar, óbærilegar. Ef aðeins þið gætuð skilið hversu græðgi ykkar er agaleg innrás í veröld stjóra Íslands. Mannanna sem fara í viðtal og fá það birt sem Fréttaskýringu;
Í upphafi var orðið og orðið var hjá Þorsteini og orðið var Fréttaskýring; leyfið mér að skýra fyrir ykkur veruleikann; hann inniheldur ekki tilveru ykkar, litlu Eflingarkonur, nema sem dæmisögu um skaðvald sem allir stjórar sem vettlingi geta valdið verða að sameinast um að stoppa,allt er undir, allt er í húfi; Áfram, Kristmenn, krossmenn, kóngsmenn erum vér; eða ætliði að láta þessarar gráðugu kvenpersónur drepa samkeppnishæfni lýðveldisins?