„Viðreisn lagði fram fyrirspurn um nefndir sem urðu til á kjörtímabilinu. Þá kom í ljós að frá nóvember 2017, þegar þessi ríkisstjórn eða sú síðasta var stofnuð, og fram til mars 2020 voru stofnaðar 248 nýjar nefndir til viðbótar við þær sem þá þegar voru starfandi,“ sagði Þorbjörg Sigríður Gunnlaugsdóttir á Alþingi.
„Það eru t.d. 37 í forsætisráðuneytinu einu og þær urðu væntanlega fleiri síðan og verða út þetta kjörtímabil. Ég ætla vitaskuld ekki að halda því fram að allt nefndastarf sé þarflaust, ég var nú að tala máli nefnda þingsins fyrr í dag.“
Þorbjörg var í andsvörum við Sigmund Davíð Gunnlaugsson.
„En ég hefði áhuga á að heyra sjónarmið háttvirts þingmanns um þetta, hvort hann telji að þetta sé áhyggjuefni, hvort ráðherrar séu komnir fram úr sér í þessu nefndablæti, eins og ég vil leyfa mér að kalla það, af því að þegar maður skoðar stjórnarsáttmála nýrrar stjórnar má segja að það séu ansi sterkar vísbendingar um að það séu fleiri nefndir í smíðum.“
Viðbrögð Sigmundar verða í næstu frétt.