„Þið hafið vatn og og orku langt umfram önnur landsvæði og ykkur verður bara gert að taka við fólki.“
Guðmundur Gunnarsson skrifaði á Facebook:
Forsætisráðherra okkar vísar í nýja skýrslu þar sem fjallað er um hlýnun jarðar og loftslagsbreytingar, sem auki enn á hættu á óstöðugleika og átökum, einkum í þróunarríkjum. Það stuðli að miklum fólksflutningum, sem líkur séu á að muni auka álag á landamærum Íslands. Umsóknum um alþjóðlega vernd hér á landi kunni að fjölga og þrýstingur aukast um að Íslendingar taki við fleiri flóttamönnum fyrir milligöngu alþjóðastofnana.
Í sambandi við þetta rifjast upp atvik sem kom upp þegar mér var falið að leiðsegja forseta kínverska ASÍ sem heimsótti Norðurlöndin fyrir nokkrum árum og skoða starfsemi norrænu verkalýðsfélaganna. Forsetinn er kona og samkvæmt því sem mér var sagt er forseti ASÍ talinn vera 5 áhrifamesti einstaklingurinn í stjórnvaldi Kína.
Hún skoðaði daglega starfsemi á skrifstofum Rafiðnaðarsambandsins og starfsmenntun í atvinnulífinu hér á landi. Hún spurðist einnig fyrir um híbýli íslenskra launamanna sem varð til þess að ég bauð henni heim til mín sýndi henni um leið hverfin í Grafarvoginum. Henni fannst garðarnir við einbýlis og raðhúsin vera ótrúlega rúmgóðir og við hefðum mikið rými hér á landi, en það ætti eftir að breytast.
Nú hvernig? spurði ég.
Hún svaraði að eftir nokkur ár myndu búa hér á landi um 20 milljónir manna.
Nei það verður aldrei svo mikið, svaraði ég, við gætum kannski reiknað með að fólksfjöldinn á Íslandi myndi aukast um nokkra tugi þúsunda.
Hún svaraði;. Skoðaðu meðalfólksfjölda í Kína pr. hektara, ef það yrði svipað á Íslandi yrði íbúafjöldinn hér á landi um 20 millj. manns og ef við skoðum löndin þar sem fólksfjöldinn er mestur pr. hektara eins á Indlandi og Indónesíu færi fólksfjöldi á Íslandi upp 46 milljónir.
Nei það verður aldrei samþykkt, svaraði ég.
„Þið verðið ekki spurð að því Guðmundur minn, þegar stóru fólksflutningarnir vegna breytinganna í loftslaginu hefjast fyrir alvöru.“ Var svar hennar. „Þið hafið vatn og og orku langt umfram önnur landsvæði og ykkur verður bara gert að taka við fólki.“