Vilhjálmur Birgisson:
„Einnig mun þessi nýja fjárfesting tryggja framtíð Norðuráls til næstu ára ef ekki áratuga.“
Það eru gjörsamlega frábærar fréttir fyrir okkur Akurnesinga og nærsveitunga sem og fyrir þjóðarbúið allt að Norðurál og Landsvirkjun hafi náð nýjum raforkusamningi sem mun leiða til þess að fyrirtækið mun ráðast í 15 milljarða fjárfestingu í nýjum steypuskála.
Það er ekki bara að þessi fjárfesting muni skapa 100 störf á uppbyggingartímanum heldur mun þessi stækkun skapa 40 varanleg störf sem og tryggja framtíð fyrirtækisins um komandi ár. En það er löngu ljóst að framleiðslugeta núverandi steypuskála hefur torveldað fráflæði frá kerskálanum og væntanlega mun þessi stækkun steypuskálans leiða til þess að álagið á bæði kerskála og steypuskála mun verða minna. Einnig mun þessi nýja fjárfesting tryggja framtíð Norðuráls til næstu ára ef ekki áratuga.
Fjárhagslegur ávinningur þjóðarbúsins er ótvíræður en ég myndi áætla að nýr raforkusamningur og 20 MW viðbót við raforkusamninginn muni skila Landsvirkjun auknum tekjum sem nema á bilinu 2 til 3 milljörðum á ári. Það er ekki bara að tekjur Landsvirkjunar muni aukast heldur mun staðgreiðsla til ríkis og sveitafélaga aukast um allt að 100 milljónir á ári vegna þess að 40 ný varanleg störf munu skapast.
Eins og áður sagði eru þetta frábærar fréttir enda er þessi fjárfesting í stækkun á steypuskálanum að tryggja og festa atvinnuöryggi minna félagsmanna sem og tryggja búsetuöryggi okkar Akurnesinga og nærsveitunga.