Marinó G. Njálsson:
Sorglegt að sjá, að seðlabankastjóri, sem kom inn með nýja hugsun, hefur gjörsamlega snúið við blaðinu og sér engar aðrar lausnir lengur en vaxtahækkanir.
Vísitala neysluverðs hækkað um 1,39% á milli mánaða sem er mun meira en gera hefði mátt ráð fyrir, sérstaklega þegar haft er í huga, að aldrei þessu vant lagði húsnæðisliður lítið til hækkunarinnar.
Í þetta sinn er það matvara (hækkun um 1,92%, framlag til verðbólgu 0,30%), föt og skór (6,87%, 0,22%) og húsgögn, heimilisbúnaður o.fl. (8,72%, 0,57%). Bara þessir þrír liðir leggja til 1,09 af þessum 1,39% sem vísitalan hækkaði. Sé þetta skoðað betur, þá eru þetta líklegast allt erlendar kostnaðarhækkanir eða hækkanir vegna lækkunar gengisins síðustu 6 mánuði gagnvart evrunni. Með hækkun USD gagnvart IKR er um 3% á þessum 6 mánuðum, þá er hækkun EUR gagnvart IKR um 9,3%.
Seðlabankinn hefur hótað að hækka vexti, en ég veit ekki hvernig hann ætlar að láta hærri vexti bíta á erlendar kostnaðarhækkanir. Ég efast síðan að nokkur aðili sé svo vitlaus að treysta á íslensk vaxtaumhverfi til að hætta peningunum sínum í. Ég er samt 100% viss um að við fáum yfir okkur enn eina vaxta hækkunina, sem mun bara setja enn meiri þrýsting á hækkun launa. Spái að hún verði 0,75-1,00%.
Rétt er svo að rifja upp fróm orð seðlabankastjóra fyrir tæpum þremur árum:
„Þetta er ný staða fyrir Íslendinga að sjá svo lága vexti. Margir virðast ekki hafa trúað því að þetta gæti raunverulega gerst og Seðlabankinn gæti beitt stýritækjum sínum með sambærilegum hætti og þekkist erlendis. Við eigum hins vegar eftir að sjá betur hver áhrifin verða raunverulega.“
Sorglegt að sjá, að seðlabankastjóri, sem kom inn með nýja hugsun, hefur gjörsamlega snúið við blaðinu og sér engar aðrar lausnir lengur en vaxtahækkanir.
Greinina birti Marinó á Facebooksíðu sinni.
