Peningana strax....!

Maríanna Friðjónsdóttir sérfræðingur í samfélagsvefjum skrifar grein í kjölfari frétta um hversu mikið Facebook kostar atvinnurekendur:

Í fréttum dagsins er því slegið upp að Facebook gæti kostað íslenskt atvinnulíf allt að 15 milljörðum á ári og er þá átt við þann tíma sem starfsmenn „hanga“ á Facebook í vinnutímanum.

Talan er tilkomin vegna niðurstöðu danskrar könnunar, þar sem danska viðskiptaráðið lét skoða fyrir sig hversu miklum tíma starfsmenn „eyddu“ á FB í vinnutímanum. Ennfremur kemur fram í tölunni að einungis 7,8% Facebook notenda virðast hafa gagn af vefsíðunni í starfi sínu í formi viðskiptavildar.

Þessar tölur eru áreiðanlega allar sannar og réttar og endurspegla aðeins einn raunveruleika. Vanmátt fyrirtækjanna til að laga sig að nýju lífi og umhverfi. Bæði á Íslandi og í Danmörku er ennþá hverfandi skilningur á þeirri breytingu, sem er að eiga sér stað frá einspora samskiptum og markaðstækni – til þeirrar gagnvirknu samtalstækni, sem felst í öflugu samfélagslífi. Fyrirtækin ættu frekar að spyrja sig – hvað get ég fengið út úr því að starfsmaðurinn minn sé með gott og stórt samskiptanet? Hvernig get ég kennt starfsmanninum að nýta sitt samfélagslíf til hagsbóta fyrir fyrirtækið, vöru okkar og þjónustu?

Frægustu mælingafyrirtæki heims eins og Forrester velta fyrir sér spurningum um ROI (Return of Investment) í samfélagsmiðlum. Þar á bæ telja menn t.d. að þeir sem eru að markaðssetja og byggja upp gagnvirka miðlun, séu hreinlega ekki nógu góðir í að mæla skilvirkni samfélagsmiðlanna. Mælingin falli þannig um sjálfa sig því verið sé að mæla það sem auðveldast er að mæla í stað þess að skoða nýjar hliðar sem ekki séu jafn augljósar við fyrstu sýn. Til dæmis hafa rannsóknir sýnt fram á að framleiðni eykst um 9% í fyrirtækjum, sem hafa opin samskipti starfsmanna á dagskránni.

Á Íslandi (og reyndar í Danmörku líka) erum við komin örskammt á veg hvað varðar vinnubrögð, hugmyndafræði og efnisvinnslu fyrir gagnvirka samskiptamiðla. En við erum kominn enn styttra á legg þegar við horfum á uppbyggingu þekkingar starfsmanna í notkun þessara miðla, þar sem vinnubrögð og hugmyndafræði eru allt önnur en auglýsinga og markaðssetningafræðin hefur haldið að okkur í áratugi. Fáein fyrirtæki eru þó að sýna hvert stefna skal og koma sér upp og móta stefnu fyrir samfélagsmiðla og kynna fyrir starfsfólki. Eitt af þeim fyrirtækjum er t.d. Flugfélag Íslands, sem í lok síðasta árs, tók skrefið til fulls. Þar var sett saman stutt og skiljanleg stefnumörkun, starfsfólkinu kennt á miðilinn – og síðan haldið í rólegheitum og fullri samvinnu út í samfélagslífið.

En það er alveg ljóst að viðvera fyrirtækja á samfélagsvefjum verður aldrei ókeypis. Hún krefst þess að einhverjir séu til í að taka þátt í partíinu – hún krefst starfsmanna. Hún krefst tækni. Hún tekur tíma. Allt eru þetta mælanlegar einingar. Sem halda verður uppi á móti einingum, sem er erfiðara að mæla. Er t.d. aukin þátttaka starfsmanna á Facebook hluti af auknum heimsóknum á vefsíðu fyrirtækisins og meðfylgjandi aukningu í sölu og ákalli á þjónustu? Spurningar, sem eru vel þess virði að skoða í nýju samhengi. Einu sinni vildu fyrirtækin líka láta loka á internetið vegna þess að starfsmenn „héngu“ þar öllum stundum. Sú umræða er löngu þögnuð.

Það sem er ekki síður skemmtilegt og gerðist við ritun þessa greinastúfs er að mínir eigin fjesbókarvinir tóku þátt í umræðunni eftir að linkað var á fréttina sem er kveikjan að pistlinum. Og verður vísað í tvö innlegg hér fyrir neðan:

Gudjon Mar Gudjonsson: „Svo er spurning hvað www.eyjan.is eða www.visir.is kosti íslensk fyrirtæki? ;-) Er ekki stóra málið hjá fyrirtækjum að læra að treysta starfsfólkinu sínu og hafa hvatningu í vinnunni? Það er því frekar spurning hvað lítil hvatning kosti viðskiptalífið í heild?“

ViVa Nse: „Örugglega hægt að finna margar líkingar, skýringar og afsakanir á útreikningum á Raunverulegum afköstum per klst. – Clay Shirky (Here comes everybody) er með nokkur dæmi í þessu myndbandi frá Web 2.0 http://blip.tv/file/855937
Þörfin fyrir símenntun vex og vex.

Umræðan er af hinu góða og hvetur okkur til að hafa ávallt í huga að keisarinn er stundum í nýjum fötum. Svo eru allir áhugasamir hvattir til að halda áfram að bæta við þessa frétt með því að nýta athugasemdadálkinn hér fyrir neðan. Kannski skutla inn eins og einum eða tveim linkum á gagnlegar upplýsingar.