Fanney Dóra Sigurjónsdóttir félagsráðgjafi er mikill matgæðingur og hefur einstakt lag á að töfra fram dýrindis máltíðir, sama hvort um er að ræða eitthvað fljótlegt og þægilegt eða veislukrásir með mikilli fyrirhöfn. Þar fyrir utan er hún enginn aukvisi þegar kemur að bakstri.

Ekki nóg með það að Fanney starfi sem félagsráðgjafi fyrir Rauða Krossinn á Akureyri og vinni aðra hverja helgi í versluninni Pottar og prik á Glerártorgi nemur hún þessa dagana viðburðarstjórnun við Háskólann á Hólum. Gaman er að segja frá því að í verknámi sínu mun hún aðstoða sjálfan viðburðameistara Íslands, Júlíus Júlíusson, við að koma Fiskideginum mikla á Dalvík á laggirnar þetta árið.

Miðjan hitti Fanney og spjallaði við hana um matargerð og fékk að bragða á dásamlegum fiskibollum á ítalska vísu. Fanney er ekki í vafa um það hvað það er með skiptir mestu máli þegar kemur að því að elda góðan mat; gott hráefni! „Ef ég er með gott hráefni í höndunum er ekki mikið mál að töfra fram eitthvað sem bragðskyninu og mallanum líkar. Góður kryddskápur er ómetanlegur og svo er ég algjör krukkusafnari. Á stóran ísskáp sem er hálffullur af allskyns gúmmilaði í krukkum sem gaman að prófa í allskonar rétti,“ segir hún.

Fanney segist þessa dagana vera á léttmetisskeiði eftir allan þunga – en dásamlega – matinn sem hún borðaði um jólin.

„Uppáhaldið þessa dagana er gufusoðið grænmeti, hvort heldur sem er eitt og sér með salti og pipar eða sem meðlæti með grænmetisbuffi, fiski eða öðru. Folaldahakk kemur líka sterkt inn og ég fer reglulega í B. Jensen í útjaðri bæjarins og byrgi mig upp að góðu gæðakjöti frá honum Erik.“

Fanneyju finnst skemmtilegast að elda mat sem tekur langan tíma að undirbúa, helst eitthvað sem hún hefur ekki prófað áður. „Best finnst mér að elda hann með góðu fólki, eins og mömmu minni eða Svenna og Leifi, kærum matarvinum mínum. Mér finnst líka mjög skemmtilegt að baka og þá sérstaklega brauð eða annað úr hnoðuðu deigi. Þegar mér líður illa eða ég er eitthvað illa fyrirkölluð set ég oftast á mig svuntuna og baka. Ég er nefnilega alveg á því að það sé þerapjútískt að hnoða deigið, leyfa því að hefast og sjá svo árangurinn þegar ilmandi brauðmetið kemur gullfallegt út úr ofninum. Ég hef oft grínast með það að ég sé með deigblæti, finnst þér ekki stórkostlegt að pota í fallegt deig?“ spyr þessi sælkerakokkur með bros á vör.

Aðspurð hvort eldamennskan breytist hjá henni eftir árstíðum stendur ekki á svörum. „Já, svo sannarlega. Árstíðabundin hráefni koma þar mikið við sögu. Á haustin og veturna þykir mér gott að gera allskonar kássur og súpur með rótargrænmeti og á sumrin er ég meira í léttum réttum og grillmat. Ég tek líka ákveðin tímabil, t.d. tímabil sem ég elda rosalega mikið af indverskum mat eða eggjaréttum. Núna er ég t.d. á gufusuðutímabili með smá dass af heitreyktum mat!“

Hér kemur fremur einföld og holl uppskrift af fiskibollum með dásamlegri linsubaunasósu.

Fiskibollur á ítalska vísu

Fiskibollur

Auðvitað má kaupa bollurnar tilbúnar í fiskbúð eða annars staðar en hér er uppskrift af fiskibollum sem gott er að eiga í frysti.

1 kg fiskur, roð- og beinlaus

ca 70 gr kartöflumjöl

ca 70 gr hveiti

4 egg

2 laukar, fínt saxaðir

1 msk salt (eða eftir smekk)

svartur pipar eftir smekk

ca 1 msk karrý (Ég hef notað indverska karrýblöndu)

rautt chilli eftir smekk (ég nota um 1 stk.)

1 tsk lyftiduft

2 hvítlauksrif

smá mjólk, ef þarf

___

Laukur, hvítlaukur og chilli saxað fínt og sett í skál. Fiskurinn hakkaður í matvinnsluvél og öllu blandað saman nema mjólk. Hún er sett í eftir þörfum. Deigsoppan á að vera frekar þykk, eða eins og hrært skyr. Best er að byrja að blanda laukblöndunni og fiskinum saman með höndunum, kreista fiskinn og hræra vel. Best er að nota ískúluskeið með sjálfvirkum sleppara (svona) eða bara venjulega skeið til að móta bollurnar. Þær eru brúnaðar á pönnu og settar á bökunarpappír inní ofn í ca 20 mín eða þar til þær eru stífar.

Linsubaunasósan:

2 dl brúnar/grænar linsubaunir

1 teningur kjötkraftur

1/4 laukur, fínt saxaður

1 lítill kínverskur hvítlaukur (eða 3-4 rif), fínt saxaður

5 cm bútur af blaðlauk, fínt saxaður

1 dós tómatbitar í dós (diced) – má vera með kryddi

2 tsk basilíka

salt og pipar

1/2-1 tsk cayenne pipar eða chilli

2 msk balsamedik

3 msk rautt pestó

nokkrar svartar ólífur, skornar í sneiðar

Linsubaunirnar eru settar í pott ásamt vatni og kjötkrafti og soðnar þar til meyrar, í um það bil hálftíma. Það fer líka eftir smekk fólks hvort það vill hafa baunirnar mauksoðnar eða smá bit í þeim svo það er betra að byrja að smakka á þeim eftir ca 25 mín. Á meðan er gott að skella forsteiktum fiskibollunum inní ofn og byrja á sósunni. Laukur og blaðlaukur er steiktur í smá olíu þar til hann er farinn að taka smá lit. Þá er hvítlauknum blandað útí og hann steiktur í mínútu. Passa að steikja hvítlaukinn ekki of lengi því þá verður hann beyskur, má ekki brúnast. Því næst eru öllu bara bætt útá pönnuna og sósan látin smá malla í 10 mín. Smakkað til og e.t.v. bætt við 1/5 dl af vatni ef hún er of þykk.

Þegar baunirnar eru soðnar eru þær sigtaðar frá vatninu og þeim bætt útá pönnuna.

Mér finnst gott að borða þetta með gufusoðnu grænmeti, t.d. gulrótum, sellerírót og blómkáli, og rífa parmesanost yfir ef sá gállinn er á mér. Best finnst mér að setja hafsalt og nýmulinn svartan pipar á grænmetið þegar það er nýkomið úr gufusuðugrindinni – það þarf ekki meira á þessar næringarbombur!

Tilbrigði: Ef fersk basilíka er til í ísskápnum er dásamlegt að bæta henni útí sósuna rétt í lokin, en ekki nauðsynlegt. Það má líka bara nota eina tegund af lauk og jafnvel bæta við öðru grænmeti ef það er eitthvað í ísskápnum sem þarf að nýtast.